"Azərbaycan üzərində bu gün ilk qələbəmizi qazandıq"
17 yaşadək futbolçulardan ibarət Azərbaycan və Ukrayna yığmaları arasında bu gün keçirilmiş yoxlama oyunundan sonra rəqib komandanın baş məşqçisi Aleksandr Petrakov fikirlərini bölüşüb. Azerisport.az xəbər verir ki, ukraynalıların çalışdırıcısı 2:0 hesablı qələbəni belə şərh edib:
"Maraqlı oyun oldu. Bu komanda ilə ötən ilin avqustunda da iki yoldaşlıq oyunu keçirmişdik və hər iki qarşılaşma heç-heçə başa çatmışdı. Ümumiyyətlə, Təbriz Həsənovun rəhbərliyi ilə bu yaş qrupunda çıxış edən Azərbaycan yığmasına qarşı indiyə qədər 4 oyun keçirmişdik və heç birində qalib müəyyənləşməmişdi. Bu gün ilk qələbəmizi qazandıq. Bununla belə, tam üstünlüyümüzün olduğunu düşünmürəm. Sona yaxın rəqib bir neçə səhvə yol verdi və biz bundan yararlana bildik. Futbolçularım daha çox oyun praktikası sarıdan əziyyət çəkir”.
