Qriqorçuk: Qəbələnin oyunlarında yol verilən hakim səhvləri həddən artıq çoxdur

"Qəbələ"nin baş məşqçisi Roman Qriqorçuk Azərbaycan Kubokunun 1/4 final mərhələsi çərçivəsində "Zirə"yə qarşı keçirəcəkləri ilk oyun öncəsi fikirlərini bölüşüb. Azerisport.az saytına açıqlamasında o, bunları söyləyib:

"Kubokda qələbə hər bir futbolçu üçün həmişə şərəflidir. Sonralar nəvələrimizə bu barədə danışarıq. Matça ciddi hazırlaşırıq. Azərbaycan kubokunu qazanmaq istəyirik. Sabah bu yolda uğurlu bir addım atmaq istəyirik. Əminəm ki, "Zirə"də də eyni şeyi düşünürlər. Onlar futbol oynamağı bacarırlar. Bunu çempionatda bir neçə dəfə sübut ediblər. Ümid etmək istərdim ki, sabah yaxşı hakimlik olacaq. Özü də təkcə sabah yox, sonrakı oyunlarımızda da. Çünki "Qəbələ"nin oyunlarında yol verilən hakim səhvləri həddən artıq çoxdur. Susa bilmirəm. Bu barədə danışmasam, kimsə düşünər ki, "Qəbələ"nin aqibətinin mənim üçün fərqi yoxdur. Amma mən komandamı sevirəm və onu müdafiə etmək istəyirəm. Ümid edirəm ki, hakimlər bundan sonra yaxşı idarəçilik edəcəklər".