Fikrət Hüseynov: Ümid edək ki, hər şey klublarımız üçün yaxşı qurtaracaq

AZAL-ın vitse-prezidenti, AFFA Klublar Komitəsinin sədri Fikrət Hüseynov bu gün baş tutan iclasdan sonra azerisport.az saytının suallarını cavablandırıb.

- Klublar Komitəsinin bu ilki ikinci toplantısında hansı qərarlar qəbul olundu?
- Üç məsələni müzakirə etdik. Birincisi, Gəncə şəhər stadionunun durumu idi. Bu arenanın vəziyyətini yaxşılaşdırmaqla bağlı İcraiyyə Komitəsinə müraciət qəbul olundu. Həmçinin bu mövsüm Azərbaycan kubokunun final matçının da orada keçirilməsini təklif etdik. Bu arenada qazonu yaxşılaşdırmaq lazımdır. Çünki klublarda Azərbaycan yığmasının üzvləri, legionerlər çıxış edirlər. Belə bərbad qazonda onların tez zədə alması istisna deyil. İkinci məsələ legionerlərə görə üzvlük haqqının azaldılması oldu. Bu məsələni 2015-ci ildə də müzakirə etmişdik. Bu dəfə PFL prezidenti Ramin Musayevin özü ilə də söhbətləşdik və məsələ həllini tapdı. Belə qərara alındı ki, növbəti mövsümdən bir legionerə görə 20 000 yox, 5000 manat ödənilsin. Üçüncü məsələ isə gənc oyunçulara görə kompensasiya ilə bağlı idi.

- Sizcə, üç aya Gəncə şəhər stadionunu hazır vəziyyətə gətirmək olar?
- Biz bu işi tezləşdirməyi məsləhət gördük. Qısa müddət ərzində arenanı arzuolunan vəziyyətə gətirmək olar. Oturacaqların quraşdırılması elə də çox vaxt alan proses deyil.

Klublardan futbolçularına olan borclarla bağlı vəziyyətin nə yerdə olduğunu da maraqlandım. Məsələn, ötən gün Ukraynanın "Dnepr" klubuna sanksiya tətbiq olundu, amma Bakı "İnter"inə toxunmadılar. Halbuki, bu iki klubun məsələsinə baxmağa eyni vaxtda başlamışdılar. Ümid edirik ki, hər şey yaxşı qurtaracaq. "Neftçi" rəsmiləri qeyd etdilər ki, Emil Mpenzaya olan borc tədricən ödəniləcək. Həmçinin "Xəzər Lənkəran" da öz borcunu ödəyəcəyini deyir.

- Deməli, "İnter"lə "Xəzər Lənkəran"ın sanksiyadan qurtulması mümkündür?
- 100 faiz belə olacağını deyə bilmərəm. Amma bu yöndə iş aparılır.