Hüseyn Məhəmmədov: Neftçi Avroliqaya çıxsa belə, bu heyətlə heç nəyə nail ola bilməyəcək
Azərbaycan yığmasının və "Neftçi"nin sabiq qapıçısı Hüseyn Məhəmmədovun azerisport.az saytına müsahibəsi
- "Neftçi"dən qovulandan sonra elə də çox işsiz qalmadınız...
- Bəli, mənə birinci divizion klubu "Qaradağ Lökbatan"dan dəvət gəldi. Burada uşaq futbolu üzrə akademiyada çalışıram. Sadıq Sadıqov sağ olsun ki, belə bir imkan yaratdı. "Neftçi"də az iş görməmişdim. Klubun yetirmələri indi Azərbaycanın müxtəlif yığmalarında oynayır.
- "Neftçi"dən qalmaqalla ayrıldığınız üçün bundan sonra heç bir Premyer Liqa klubunun sizinlə maraqlanmayacağından qorxmursunuz?
- Hər şeyin o dərəcədə pis olacağını düşünmürəm. Hələ ki, məşqçi kimi burada təcrübə yığmağa çalışacağam. Azərbaycan futbolunda məni hər kəs tanıyır.
- "Neftçi"nin son turda "Zirə"yə böyük hesabla uduzmasını necə qarşıladınız?
- Pis. "Zirə"nin bu komandaya üç qol vuracağını gözləmirdim. "Neftçi"dən getsəm də, yenə ürəyim bu komanda ilədir. Komandanı bu vəziyyətdə görmək çox üzücüdür.
- Sizcə, "Neftçi" niyə indiyə kimi debütanta heç bir oyunda qalib gələ bilmir?
- Problem oyunçu seçimindədir. Futbolçuların səviyyəsi aşağıdır. Düzdür, komandada gənc və perspektivli oyunçular az deyil. Amma bu heyət böyük hədəflərə çatmaq üçün yetərli deyil. Onlar gələcəkdə nəsə edə bilərlər, amma indi yox. Mən bildiyimə görə, rəhbərlik də komandanın qarşısına yüksək hədəflər qoymayıb.
- Rəhbərlik əsas hədəfin avrokuboklara vəsiqə qazanmaq olduğunu deyir...
- Bu, real deyil. Hətta nəyinsə sayəsində avrokuboklara vəsiqə qazansalar da belə, orada bu heyətlə heç nəyə nail ola bilməyəcəklər.
- Komandada altı legioner var...
- Yenicə gələn Nikolas Kanalesi çıxmaq şərtilə, mən onlardan heç birini komandada saxlamazdım. Onlar kluba xeyir vermirlər. Onların hamısını "Neftçi"dən qovardım. Gənc oyunçulara nə verə bilirlər ki? Demək olar ki, heç nə.
- Bəlkə məsələ heç də legionerlərin səviyyəsində deyil?
- Əsgər Abdullayevdən nəticə tələb etmək çətindir. Çünki bu heyəti o yığmayıb. Belə oyunçularla nəticə vermək çətindir. Mən onu günahlandırmazdım. Həm də bilmək olmaz, bəlkə də o, komandasına inanır və nəyisə dəyişə biləcək.
