Qarabağ Xocalı faciəsini yad etdi
"Qarabağ" klubunda bu gün Xocalı faciəsi ilə bağlı toplantı keçirilib. Azerisport.az xəbər verir ki, toplantıda Ağdam klubunun prezidenti Tahir Gözəl də iştirak edib.
Məlum olduğu kimi, 1992-ci ildə, fevralın 26-sına keçən gecə nəinki Azərbaycan, eləcə də dünya tarixinə ən acımasız günlərdən biri qeydə alınıb. Erməni təcavüzkarlarının Xocalı şəhərində törətdikləri qətliam bəşər tarixinə qanlı hərflərlə düşüb. İllər keçsə də, xalqımız bu faciəni unutmur. "Qarabağ"ın vitse-prezidenti Tahir Gözəl də hər il olduğu kimi bu il də analoji hadisənin qurbanlarını yad etmək üçün klub bazasını ziyarət edib. Baş tutan görüşdə ilk olaraq faciədə ölənlərin ruhu 1 dəqiqəlik sükutla yad edilib. Ardınca Tahir Gözəl 1992-ci ildə baş verən faciə haqqında danışıb. Məsələyə hər zaman olduğu kimi, fərqli yöndən yanaşan klub prezidenti baş verən faciənin bir millətin, xalqın deyil, bütün bəşəriyyətin üzüntüsünün olduğunu qeyd edib. O, 600-dən çox günahsız insanın qətl edilməsinə heç bir insani don geyindirməyin mümkün olmadığını bildirib. Yüzlərlə günahsız insanın qətl edilməsinin arxasında heç bir torpaq, milli inanc dayana bilməyəcəyini qeyd edib. Xocalıda baş verənlərin insanlıq üçün utancverici olduğunu bildirib. Xocalıda qətl edilən uşaqların sadəcə Azərbaycanın deyil, bütün xalqların övladları olduğunu bildirbi. Hər birimizin öncə insan olduğunu və yaradılış qayəmizdə qan tökməyin, pislik etməyin olmadığını vurğulayıb. Suriya və dünyanın başqa yerlərində tökülən insan qanlarının çox ağır olduğunu bildirib. Gözəl bütün dünyaya sülh, qansız, müharibəsiz həyat arzuladığını bildirib. (klub saytı)
