Əsgər Abdullayev: Yekunda hər şey bizim istədiyimiz kimi olacaq

"Neftçi"nin baş məşqçisi Əsgər Abdullayev Topaz Premyer Liqasının 23-cü turu çərçivəsində "Zirə"yə qarşı keçirəcəkləri oyun öncəsi azerisport.az saytının suallarını cavablandırıb.

- "Zirə" ilə oyundan nə gözləyirsiniz?
- Normal rejimdə hazırlaşırıq. Rahil Məmmədovun ayağında ağrılar var. Məqsəd İsayev də hələ zədəlidir. Amma bütövlükdə, ciddi itkimiz yoxdur.

- Nikolas Kanales "Zirə"yə qarşı oynaya bilər?
- Komanda ilə birgə məşq edir. Amma o, hələ tam hazır deyil. Dəqiq oynayacağını deyə bilmərəm. Ola bilər oynasın, ola bilər yox (gülür).

- "Neftçi" hələ zirəlilərə qalib gələ bilməyib...
- Bu komanda çox yaxşı kollektiv oyun sərgiləyir. Sürətli hücumlar qurmağı bacarırlar. Üçüncü dövrəyə də çox yaxşı başlayıblar. Təsadüfən ikinci pillədə qərarlaşmayıblar.

- Bəs komandanız belə bir rəqibə qalib gəlmək üçün nə etməlidir?
- Bizə öz futbolumuzu sərgiləmək lazımdır. Uğurlu çıxış etməyə çalışacağıq.

- Belə bir təəssürat var ki, "Neftçi" pis oynamır, amma yaxşı da oynamır...
- Bütövlükdə, belə deməzdim. "Qarabağ"a qarşı keçirdiyimiz sonuncu oyunu götürsək, gözlənilməz ilk qoldan sonra oyun intizamı pozuldu. Bu, bizim oyun planımıza çox ciddi təsir göstərdi. Çünki buraxılan qoldan sonra tələsməyə aşladıq. Tələsəndə də səhvlər qaçılmaz olur. İstədiyim oyunu komandamdan ala bilmədim.

- Digər uşaqları da öz ardınca aparmalı olan komandanın liderlərinin çıxışından razısınız?
- Hər şey o qədər də pis deyil. Səhvlər hər kəsdə olur. Futbol da səhvlər üzərində qurulmuş oyundur. Fikrimcə, yekunda hər şey bizim istədiyimiz kimi olacaq.

- Məsələn, Araz Abdullayev kapitan kimi sizi qane edir?
- Bu futbolçunun böyük potensialı var. Ondan çox şey gözləyirik. Mən bütün futbolçulara güvənirəm. Bu heyət qarşıya qoyulan bütün hədəflərə çata bilər. Komandadan xüsusi narazılığım yoxdur.