Mətin Gülər: Rusiya qarşı sərgilədiyimiz oyunla istənilən rəqibə qalib gələ bilərik
Azərbaycanın 17 yaşadək futbolçulardan ibarət yığma komandasının yarımmüdafiəçisi Mətin Gülər Bakıda Rusiyaya qarşı keçirdikləri ikinci yoxlama oyunundan (1:0) sonra jurnalistlərin suallarını cavablandırıb. Azerisport.az sizi həmin açıqlamalarla tanış edir.
- Rusiya ilə son oyunla bağlı nə deyə bilərsiniz?
- Görüşün startından son dəqiqələrənə qədər üstünlük bizim tərəfimizdə idi. Qol vəziyyətləri yaratdıq, sadəcə, uzun müddət onlardan yararlana bilmədik. Görüşün son dəqiqələrində fərqlənsək də, biz bu oyunda qələbəyə layiq idik.
- Bu oyunda baxımlı qola imza atdınız...
- Mən gözlədim ki, top mənə tam çatsın və dəqiq zərbə vurum. Şadam ki, qol vura bildim.
- Bu qələbəni əvvəlki oyundakı 1:5 hesablı məğlubiyyətin revanşı saymaq olar?
- Fikrimcə, Rusiyadan qisasımızı aldıq.
- Bəs ilk oyunda niyə elə böyük hesabla uduzmuşdunuz?
- Səhvlərə yol verdik və uduzduq. Baxmayaraq ki, ruslardan daha yaxşı oynamışdıq. Sadəcə, əks-hücumlar zamanı kobud səhvlər buraxdıq ki, bu da sonda məğlubiyyətlə nəticələndi.
- Qarşıda Ukrayna ilə yoxlama oyunları var. Həmin görüşlərdən nə gözləyirsiniz?
- Yaxşı komandadır. Biz əvvəllər onlarla görüşmüşük. Həmin görüşlər heç-heçə bitmişdi. Fikrimcə, bu dəfə Ukraynaya qalib gələcəyik. Baxmayaraq ki, heyətlərində güclü oyunçular var.
- Millimizin Bakıda keçiriləcək AÇ-2016-nın final mərhələsindəki hədəfi nədən ibarət olacaq?
- Rusiya ilə ikinci oyundakı kimi çıxış edə bilsək, istənilən rəqibə qalib gələrik. Bunu tam əminliklə söyləyirəm.
- Sizcə, millimizin AÇ-nin qalibi olması real görünür, yoxsa elə-belə arzudur?
- Fikrimcə, biz güclüyük. Amma səhvlərimiz olur. Sadəcə, Avropa çempionatına qədər bu səhvləri aradan qaldırmaq lazımdır. Buna nail ola bilsək, AÇ-ni qazana bilərik. Bu, heç də arzu deyil. Bizim hədəfimiz budur.
- "Beşiktaş"dakı işləriniz necə gedir?
- Normal.
- 1:5 hesablı məğlubiyyətdən sonra klubunuzdan kimsə zəng etməyib?
- Xeyr, "Beşiktaş"dan əlaqə saxlayan olmayıb.
- Gələcəkdə Azərbaycan və Türkiyə yığmaları arasında seçim etməli olsanız, hansı addımı atacaqsınız?
- Hələ bu suala cavab vermək istəmirəm.
