Juninyo: Kəpəz motivasiya baxımından problem yaşamır

"Kəpəz"in yarımmüdafiəçisi Juninyo Topaz Premyer Liqasının 22-ci turunda "İnter"ə 0:1 hesabıyla uduzduqları oyundan sonra azerisport.az saytının suallarını cavablandırıb.

- Paytaxt klubuna məğlubiyyətinizi necə şərh edə bilərsiniz?
- Biz yaxşı oynadıq. Qol vurmaq üçün də şanslarımız oldu. Sadəcə, onlardan yararlana bilmədik və uduzduq. Bu məğlubiyyətdən dərs çıxarmaq lazımdır. Bu oyunda buraxdığımız səhvləri təkrarlamamalıyıq.

- Siz tez-tez oyunu öz üzərinizə götürürsünüz. Amma bu dəfə alınmadı...
- "İnter"in müdafiəçiləri bizə qarşı inamlı oynadılar. İstənilən halda bu görüş geridə qalıb. Artıq növbəti oyunu düşünməliyik.

- Bəlkə ev oyununda "Qarabağ"dan buraxdığınız kuryoz qolun mənfi təsiri hələ də qalır...
- Xeyr. Həmin məğlubiyyət bizə heç bir təsir göstərməmişdi. Ağdam klubu ilə görüş geridə qalmışdı. Düzdür, "Qarabağ"a da, "İnter"ə də uduzduq. Bu, bizim üçün çox pis nəticədir. Amma sərgilənən oyun baxımından problem yoxdur. Hər halda bu oyunları unudub, növbəti görüşlərdə uğur qazanmaq barədə düşünməliyik.

- Qarşıda "Sumqayıt"la oyun var...
- Asan olmayacaq. Bu matça çox ciddi hazırlaşmalıyıq. Qələbə qazanmaq istəyirik. Bunun üçün çox intizamlı və diqqətli oynamalıyıq.

- Sumqayıtlılar ardıcıl üç məğlubiyyətdən sonra son turda qalib gəlib. Sizə elə gəlmir ki, bu, onlar üçün müsbət məqamdır?
- Əlbəttə, indi onlarda motivasiya normal səviyyədədir. Amma biz də motivasiya baxımından problem yaşamırıq. Meydana yalnız qələbə üçün çıxacağıq.

- Gəncədəki stadionun qazonu ürəkaçan deyil. "Sumqayıt" isə süni örtüklü meydanda çıxış edir...
- Meydana çıxan hər iki komanda eyni şərtlər altında oynayacaq: həm biz, həm də rəqibimiz. Bunun kimin üçünsə üstünlük, digəri üçün problem hesab etmirəm.