Sergey Matveyev millimiz üzərindəki qələbədən və Olimpiya stadionundan danışdı

Rusiyanın U-17 yığmasının baş məşqçisi Sergey Matveyev Bakıda Azərbaycan yığmasına qarşı keçirdikləri yoxlama oyununu şərh edib. Azerisport.az xəbər verir ki, o, Rusiya Futbol Federasiyasının rəsmi saytına açıqlamasında 5:1 hesabıyla qalib gəldikləri görüşdən sonra bunları söyləyib:

"Bütövlükdə, bu matçda komandadan razı qaldım. Böyük hesablı qələbə sevindirir, müsbət emosiyalar bəxş edir. Amma Azərbaycana qarşı daha bir oyun keçirməliyik. Yenə keyfiyyətli oyun göstərməliyik. Rəqib yəqin ki, revanş almağa, ilk oyundakı məğlubiyyətin əvəzini çıxmağa çalışacaq. Özü də bu matçın nəticəsi meydan sahibləri üçün bir qədər sərt alındı. Baxmayaraq ki, hesab 2:1 olarkən rəqib oyunçu səhvə yol verməsəydi, qarşılaşmanın nəticəsi fərqli də ola bilərdi. Çünki bərabər səviyyəli oyun gedirdi. İkinci oyunda heyətlə bağlı ciddi rotasiyaya əl atmayacağıq. Oynadığımız stadionun qazonunu da xüsusi qeyd etmək istərdim. Qazon ideal idi. Çox keyfiyyətli meydanda oynadıq. Arenanın özü də möhtəşəmdir. Hansı ki, burada U-17-lər arasında AÇ-2016-nın final oyunu keçiriləcək. Onu da əlavə etmək lazımdır ki, Azərbaycan bizimlə oyunlara qarşıdakı qitə birinciliyi öncəsi test gözüylə baxır. Əlbəttə, biz də may ayında buraya gəlmək istərdik".