Arif Əsədov: İran millisi ümumiyyətlə, peşəkarlardan ibarət idi

Azərbaycan yığmasının sabiq futbolçusu Arif Əsədov İranda aktyorlar arasında təşkil olunan turnirdəki iştirakları barədə danışıb. Azerisport.az saytına açıqlamasında o, bunları söyləyib:

"Reqlamentə görə, aktyorlarla yanaşı, meydana 4-5 veteran futbolçu da çıxa bilərdi. Bizdə elə alındı ki, keçmiş futbolçuların sayı çox idi. Həm də turnirin baş tutub-tutmayacağı bəlli deyildi. Mənə də son anda dedilər ki, aeoroporta gəl. Cəmi doqquz nəfər idik. Meydana isə yeddi oyunçu çıxa bilərdi. Siz İran yığmasını görəydiniz. Oradakıların hamısı peşəkarlar idi. Yunanların heyətində Oleq Protasov da oynayırdı. Bizim ilk oyunumuzdaca Ramiz Məmmədov zədələndi. Sonra Kənan Kərimovu da itirdik. Qrup mərhələsində İsveç və Yunanıstana uduzduq (2:3). Növbəti gün Rumıniyaya da məğlub olduq (1:4). Almaniya ilə oyunumuz isə ümumiyyətlə baş tutmadı. Çünki bizim meydana çıxmağa yetərli futbolçumuz yox idi".