Elnur Abdullayev: Böhran Premyer Liqamızın səviyyəsinə təsir edib
"İnter"in yarımmüdafiəçisi Elnur Abdullayev Topaz Premyer Liqasının səviyyəsinin aşağı düşdüyü qənaətindədir. Azerisport.az saytına açıqlamasında təcrübəli futbolçu bunları söyləyib:
"Biz üç tur idi ki, qələbə qazana bilmirdik. Bu da komandaya çox pis təsir edirdi. Nəhayət ki, "Kəpəz"ə qalib gəlməklə uğursuz gedişata son qoyduq. Minimal hesabla qalib gəlsək də, mənə elə gəlir ki, hətta ikinci qolu da vura bilərdik. Son dövrlər əsas heyət üzvünə çevrilməyim sevindirir. Qarşıda hələ çox oyun var və ümid edirəm ki, turnir cədvəlindəki vəziyyətimizi də yaxşılaşdıra biləcəyik. İlk üçlüyə düşmək istədiyimizi gizlətmirik. Qarşıda "Qarabağ"la oyun var. Bu görüşə ciddi hazırlaşmalıyıq. Əvvəllər çempionluq uğrunda 7-8 komanda mübarizə aparardı. İndi isə 2-3 komandanın belə bir iddiası var. Böhran təsirini göstərir. Düzünü deyim ki, "Simurq"un yenidən qayıtmasını, "Xəzər Lənkəran"ın heyətini gücləndirməsini istəyərdim. Onda çempionatımız daha güclü olardı".
