Mərkəzi arenanın direktoru: AÇ-2016-nın oyunlarına ev sahibliyi etməyəcəyik

Tofiq Bəhramov adına Respublika stadionunun yeni direktoru Şamil Quliyevin azerisport.az saytına müsahibəsi

- Mərkəzi arenanın direktoru təyin olunana qədər nə işlə məşğul olurdunuz?
- İş təcrübəm böyükdür. Amma əsas dövlət strukturlarında çalışmışam.

- İdman keçmişiniz var?
- Peşəkar idmanla heç vaxt məşğul olmamışam. Amma idman həyatımda həmişə olub. Müxtəlif illədə voleybolla, stolüstü tennislə, şahmatla məşğul olmuşam. İndi də formada qalmaq üçün müxtəlif fikizi çalışmalarla məşğul oluram.

- Stadion rəhbəri kimi hansı planlarınız var?
- Qısamüddətli plan stadionda bəzi yenidənqurma işləri aparmaqdır. Bizim "Qarabağ"la müqaviləmiz var. Klubla birgə arenanın ot örtüyünü yeniləmək barədə hazırlıq işləri görürük. Uzunmüddətli planlarımıza gəlincə, biz 2017-ci ildə keçiriləcək İslam Oyunlarına hazırlaşırıq.

- Digər klubların da ev oyunlarını burada keçirmək kimi istəyi olub?
- Belə təkliflər olub, yenə də var. Unutmayın ki, Tofiq Bəhramov stadionu ölkənin mərkəzi arenasıdır.  Təbii ki, əksər klublar burada oynamaq istəyir. Amma dediyim kimi, biz hazırda qazonu yaxşılaşdırmaq üçün iş görürük.

- Bəs arenanın boşluğu nədən qaynaqlanır?
- Kim dedi ki, boşdur? Bu gün də stadionda gənc idmançılar öz məşqlərini edirlər. Heç bir boşluq yoxdur. Sadəcə, bir qədər gözləmək lazımdır. Təmir işləri başa çatandan sonra burada keçiriləcək tədbirlərin sayı çoxalacaq, oynamaq istəyən klublar müəyyənləşəcək.

- 17 yaşadək yığma komandalar arasındakı Avropa çempionu Azərbaycanda keçiriləcək. Həmin oyunlara da ev sahibliyi edə bilməyəcəksiniz?
- Təəssüf ki, bu turnirin keçirilməsi burada aparılacaq təmir işləri ilə üst-üstə düşəcək. Bu üzdən də həmin oyunları stadionumuzda təşkil edə bilməyəcəyik.

- Azərbaycanda hansı kluba azarkeşlik edirsiniz?
- Mən təmiz və yaxşı futbola azarkeşlik edirəm.