Fariz Nəcəfov: Qəbələdə çatışmazlıqlar var, amma psixoloji baxımdan hər şey yaxşıdır
"Qəbələ"nin vitse-prezidenti Fariz Nəcəfov Topaz Premyer Liqasının 22-ci turu çərçivəsində "Rəvan"a qarçı keçirdikləri oyundan (1:0) sonra azerisport.az saytının suallarını cavablandırıb.
- Oyun barədə nə deyə bilərsiniz?
- Gərgin oyun alındı. Bu qədər çətin olacağını düşünmürdüm. Hücumda ələ düşən şanslardan lazımınca yararlana bilmədik.
- Ardıcıl üç qələbədən sonra "Qəbələ"də hər şeyin qaydasında olduğunu demək olar?
- Hər şeyin qaydasında olduğunu deməzdim. Çatışmazlıqlar var. Amma psixoloji baxımdan hər şey yaxşıdır.
- Elə isə komandada nə çatışmır?
- Hücum xəttində çatışmazlıqlar var. Dodo və Aleksey Antonovun yoxluğu sözünü deyir.
- Bəs qış fasiləsində hücum xəttini niyə gücləndirmədiniz?
- Əslində oyunçu axtarırdıq. Amma tapa bilmədik. Variantlar da var idi. Sadəcə, danışıqlar uğurlu alınmadı.
- Deməli, Ermin Zetslə Aleksey Antonovdan razı deyilsiniz?
- Onların hər ikisi güclü oyunçudur. Amma mən gözləiyimi görə bilmirəm. Zets bu ilə yaxşı başlayıb, iki qol da vurub. Antonov isə mövsüm ərzində altı dəfə fərqlənib. Buna baxmayaraq, onlardan daha artıq məhsuldarlıq gözləyirəm.
- Belə getsə, onların yayda başqa kluba keçməsi mümkündür?
- Bu barədə bir söz deyə bilmərəm. Belə məsələləri baş məşqçi həll edir.
- "Qəbələ"nin son turlardakı çıxışı ötən mövsümü xatırladır. O vaxt da mövsümün ikinci yarısına pis başladınız, sonra ardıcıl qələbələr sayəsində avrokuboklara vəsiqə qazandınız...
- Bu mövsüm çempionluğa oynayırıq. Amma ötən mövsüm "Zirə" kimi komanda yox idi. Bu klub hazırda hər kəsi təəccübləndirir. Qısa müddət ərzində elə güclü komanda yaradıblar. Bizim də üç futbolçumuz hazırda icarə əsasında həmin komandada çıxış edir. Bu, sevindirməyə bilməz. Onları icarə verdiyimizə görə təəssüflənmirik. Çünki bizdə qalsaydılar, bu qədər oyun şansı qazana bilməyəcəkdilər.
- Klubun büdcəsi devalvasiyadan sonra azalmayıb?
- Xeyr. Müəyyən islahatlar oldu. Uşaq komandaları arasında təşkil olunan turnir ləğv olundu. Çünki onun böyük büdcəsi var idi. Həmin məbləği başqa ehtiyaclarımıza yönəldəcəyik. Stadionumuzun təmiri ilə də məşğuluq.
