Rahid Əmirquliyev: Hələ ki, yaxşı formada deyiləm
"Qarabağ"ın yarımmüdafiəçisi Rahid Əmirquliyev Topaz Premyer Liqasının 22-ci turu çərçivəsində "Neftçi"yə qarşı keçirdikləri oyundan (2:0) sonra azerisport.az saytının suallarını cavablandırıb.
- "Neftçi" üzərində qələbəni necə şərh edə bilərsiniz?
- Çətin oyun olacağını bilirdik. Başa düşürdük ki, "Neftçi" turnir cədvəlinin ortalarında qərarlaşsa da, həmişə güclüdür. Amma biz öz oyunumuzu sərgiləyib, qalib gəldik. Bu qələbəyə görə çox sevincliyik.
- Sizcə, öz oyununuzu göstərə bildiniz?
- Əlbəttə, rəqib buna tam imkan vermədi. Amma əsas odur ki, qalib gəldik.
- 81-ci dəqiqədə meydana çıxdınız. Öz oyununuz barədə nə deyərdiniz?
- Hardasa bir ay idi oynamırdım. Zədəli oldum, buna görə müalicə aldım. Hələ ki, yaxşı formada deyiləm. Əvvəlki formamı bərpa edib, komandama kömək etmək istəyirəm.
- Erkən qolu qəbəbənizdə həlledici amil saymaq olar?
- Bəli, erkən qol bizim qələbə qazanmağımıza çox kömək etdi. Erkən qol həmişə faydalı olur. "Neftçi" meydanda açıq futbol sərgiləməyə başlayandan sonra bizə daha rahat oldu.
- "Qarabağ"la "Neftçi" arasındakı oyunlar gərginliyi ilə seçilir. Bu atmosferi hiss etdiniz?
- Bu, turun mərkəzi oyunu idi. Ajiotaj da var idi. Azarkeşlər də az deyildi. Oyun maraqlı oldu. Əvvəllər "Xəzər Lənkəran"la "Neftçi" arasındakı maraqlı olurdu. İndi isə gördüyünüz kimi, "Xəzər Lənkəran"dakı vəziyyət yaxşı deyil. Bu üzdən də hazırda turun mərkəzi oyunu "Qarabağ"la "Neftçi" arasındakı oyunlardır.
- Siz bu atmosferi hiss etdiniz?
- Bəli, hiss olunurdu.
