Muarem Muarem: Neftçi ilə oyuna yaxşı başladığımız üçün qalib gəldik
"Qarabağ"ın yarımmüdafiəçisi Muarem Muarem Topaz Premyer Liqasının 22-ci turu çərçivəsində "Neftçi" üzərində 2:0 hesablı qələbə qazandıqları oyundan sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Çətin olacağını bilirdik. "Neftçi" son turlarda uğurlu çıxış edirdi. Oyunlarını izləmişdik. Amma biz bu gün oyuna yaxşı başladıq və nəticədə qalib gəldik. Buna görə şadıq.
- "Neftçi"yə qarşı əvvəllər də oynamışdınız. Bu komanda çoxmu dəyişib?
- Çoxlu gənc futbolçu peyda olub. Amma yenə də bu komandaya qarşı oyunlarımız çətin olur. Onlar özlərini yaxşı tərəfdən göstərə bildilər.
- Əvvəlki Muaremi nə vaxt görə biləcəyik?
- Son 5-6 ayda Türkiyədə olarkən 3-4 oyunda meydana çıxmışdım. İndi öz üzərimdə çalışıram. Komandaya daha çox fayda vermək üçün əlimdən gələni edirəm.
- Deməli, sizdə əsas çatışmazlıq oyun təcrübəsi ilə bağlıdır?
- Bəli. Bu da normaldır. Çünki uzun müddət idi meydandan kənarda qalmışdım. Əvvəlki formanı yığmaq üçün vaxt lazımdır.
- Əksəriyyət bu oyunun bol qollu və aqressiv alınacağını düşünürdü. Sizcə, niyə gözləntilər özünü doğrultmadı?
- Prinsipcə, hər şey necə lazımdı, elə də alındı. Aqressivliyə də ehtiyac yox idi. Ümid edirəm ki, bütün oyunlar belə keçər.
- "Qarabağ" bu mövsüm ilk dəfə "Neftçi"yə qalib gəldi. Qurban Qurbanov bunun üçün nəsə hazırlamışdı?
- Xeyr, heç bir xüsusi hazırlıq olmamışdı. O, hətta AZAL-a məğlubiyyətdən sonra da belə oynamağa davam etməyimizi tapşırmışdı. Qələbə isə öz-özünə gəlir.
- Əsas izləyiciniz "Zirə" ilə xal fərqiniz elə də çox deyil. Bu üstünlüyünüzü marta qədər qoruya bilsəniz, çempionluğu özünüz üçün təmin edə bilərsiniz?
- Xal fərqinin olması yaxşıdır. Amma marta hələ çox var. Elə çempionluqdan da danışmaq tezdir.
