Simaitis: Azərbaycanda hansı komanda sabit çıxış edir ki?
"Kəpəz"in qapıçısı Tadas Simaitis Topaz Premyer Liqasının 22-ci turu çərçivəsində "İnter"ə 0:1 hesabıyla uduzduqları oyundan sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Nə demək olar? Təəssüf ki, məğlub olduq. "İnter"ə qarşı oynamaq çətin idi. Rəqibin əla kollektivi var. Bizə qarşı çox yaxşı oynadılar. "İnter" qələbəni bizdən daha çox arzulayırdı. Bizim oyunumuz isə alınmadı.
- Bu məğlubiyyətin əsas səbəbini nədə görürsünüz?
- Heç özüm də bilmirəm. Amma müəyyən səbəbləri var. Məsələn, bu il ilk dəfə süni örtüklü meydanda oynayırdıq. Bu, məyyən mənada bizə mane oldu. Uşaqlar heç də ən yaxşı oyunlarını göstərə bilmədilər. Buna görə də uduzduq.
- Maraqlıdır ki, siz süni örtüklü qazondan şikayətləndiyiniz halda, digər komandalar da Gəncə şəhər stadionunun qazonundan şikayətçidir...
- (gülür) Bəli, doğrudan da elədir. Gəncədəki arenanın qazonu faciəvidir. Belə meydanda oynamaq mümkünsüzdür. Amma nəzərə almaq lazımdır ki, meydana çıxan hər komanda eyni şərtlər altında oynayır. Biz isə üç oyundan sonra süni örtüklü meydanda oynamaq məcburiyyətində qaldıq. Burada isə fərqli futbol oynamaq lazımdır.
- İki ardıcıl məğlubiyyət sizin avrokuboklar uğrunda mübarizə aparmağınıza problem yaratmayacaq?
- Fikrimcə, bizim hələ şansımız qalır. Sadəcə, bu şansdan yararlanmaq lazımdır. Qarşıda daha 15 oyun var. Bu görüşlərdə mümkün qədər çox xal toplamaq lazımdır.
- Sizə elə gəlmir ki, "Kəpəz" indi qeyri-sabit çıxış edir?
- Azərbaycanda hansı komanda sabit çıxış edir ki? Hətta ölkənin ən güclüsü "Qarabağ" da üç oyun ardıcıl qələbə qazana bilmir. Azərbaycan çempionatı çox maraqlıdır. Burada oynamaq xoşuma gəlir. Çünki hansı oyunda xal itirəcəyini bilmirsən. Burada istənilən komanda qələbə qazana bilər. Bu da normaldır.
- Mövsümün birinci yarısını yaxşı keçirdiyinizi nəzərə alsaq, sizə başqa klublardan təklif gəlməyib?
- Təklif yoxdur. "Kəpəz"lə mövsümün sonunadək müqaviləm var. Ondan sonra necə olacağını isə bilmirəm.
- Hazırda çempionatımızın ən sabit qapıçılarından birisiniz. Bu, sizin Litva yığmasına dəvət almağınız üçün yetərli deyil?
- İndi bizim yığmanın yeni baş məşqçisi var. Fikrimcə, yığmamıza düşmək şansım elə də yüksək deyil. Çünki orada "Espanyol"dan Gedryus Arlauskis, Buxarest "Dinamo"sundan Vitautas Çernyauskas, "Renn"dən Edvinas Gertmonas, "Qaziantepspor"dan Jidrunas Karçemarskas var. Onların hamısı yüksək səviyyəli qapıçıdır və yığma komandada çıxış edirlər.
- Deməli, "Kəpəz"də oynamaqla Litva yığmasına düşmək çətindir?
- İnanın ki, qapıçı olmasaydım, başqa mövqedə oynasaydım, indi çoxdan yığmaya dəvət alardım. Amma ölkəmizdə 5-6 yüksək səviyyəli qapıçı olduğundan buna nail olmağım çətindir.
