Rahid Əmirquliyev: Neftçi ilə oyunda meydana çıxmağa hazıram
"Qarabağ"ın yarımmüdafiəçisi Rahid Əmirquliyev Topaz Premyer Liqasının 22-ci turu çərçivəsində "Neftçi"yə qarşı keçiriləcək oyun öncəsi azerisport.az saytının suallarını cavablandırıb.
- Özünüzü zədədən sonra necə hiss edirsiniz?
- Bu həftədən etibarən komanda ilə məşqlərə başlamışam. Özümü yaxşı hiss edirəm.
- Deməli, "Neftçi" ilə prinsipial qarşılaşmaya qədər hazır olacaqsınız?
- Demək olar ki, hazıram. Baxmayaraq ki, artıq bir aydır oyun təcrübəm yoxdur. Bu, əlbəttə, mənfi haldır.
- Amma hər halda qarşıdakı oyunda özünüz meydanda olmağı istəyərsiniz...
- Əlbəttə, meydana çıxmaq, oynamaq istəyirəm. Amma belə bir şans qazanıb-qazanmayacağımı dəqiq bilmirəm. Buna baş məşqçi qərar verəcək. Tam hazır olduğumu hesab etsələr, yəqin ki, oynayaram. Komandama kömək etmək istəyirəm. Amma hər şey özümdən asılı deyil.
- "Neftçi" ilə oyundan nə gözləyirsiniz?
- Öz meydanımızda oynayacağıq. Ona görə də yaxşı oyun sərgiləməyə, üç xal qazanmağa çalışacağıq. "Qarabağ" bu mövsüm "Neftçi"yə qalib gələ bilməyib. Artıq qələbə qazanmaq vaxtıdır.
- Yəqin ki, "Neftçi"nin "Xəzər Lənkəran"la oyununa baxmısınız...
- Bəli, baxdım. "Xəzər Lənkəran"dan elə oyun gözləmirdim. Keçmiş komandam ikinci hissəni daha yaxşı keçirdi. Qol da vura bilərdilər. Yenə də nəsə çatışmadı. Bu, "Xəzər Lənkəran"da ənənəvi hala çevrilib. İstənilən halda gənc futbolçuların sərgilədiyi oyun optimist olmağa əsas verir.
- "Zirə" sizdən altı xal geri qalır, "Qəbələ" isə on xal. Bu, sizi arxayınlaşdırmır?
- Son iki oyunumuz da göstərdi ki, komandamızda arxayınlıq yoxdur. Ola da bilməz. Cəmi iki oyunda xal itirmək yetərlidir ki, üstünlüyümüzü itirək. Bizdən çempionluq yolunda xal almaq istəyən komandalar çoxdur.
