Elnur Cəfərov: Nəyə qadir olduğumu göstərə bilsəm, İspaniyada qalmaq şansım var

Azərbaycanın U-21 yığmasının və "Xəzər Lənkəran"ın futbolçusu Elnur Cəfərovun azerisport.az saytına müsahibəsi

- İspaniyaya uçuşunuz necə keçdi?
- Yaxşı. Öncə Madridə gəldim. Bir neçə saat orada qaldıqdan sonra Ovyedoya yollandım. Məni yaxşı qəbul etdilər. Özümü normal hiss edirəm.

- Sizi harada yerləşdiriblər?
- Baxışda olduğum dövrdə oteldə qalacağam. Bu, təxminən bir həftə və ya on gün çəkəcək. Xoşlarına gəlsəm, qalacağam. Elə olan halda klub mənim yaşamağım üçün yer təşkil edəcək.

- "Real Ovyedo"da qalmaq şanslarınızı necə qiymətləndirərdiniz?
- İndi mənə bu barədə danışmaq çətindir. İlk məşqdən sonra nəsə demək olar. Təbii ki, hər şey özümdən asılıdır. Nəyə qadir olduğumu tam göstərə bilsəm, qalmaq şansım var. Güclü klubdur. La Liqada oynayıb. İndi Sequnda liqada üçüncü yerdə qərarlaşıb və İspaniya futbolunun elitasına qayıtmağa çalışır.

- İspaniya klubunun maraq dairəsinə düşməyiniz necə baş verdi?
- Tanışlar bu barədə onlara danışıblar. Bu barədə çox danışmaq istəmirəm. Əsas odur ki, hazırda İspaniyadayam və bu, mənim üçün böyük şansdır. Bu şansdan yararlanmağım lazımdır.

- Yəqin ki, ispan dilini bilmədiyiniz üçün sizə çətindir...
- Təbii ki, müəyyən vaxt ərzində bu, çətinlik yaradacaq. Amma bu, həlli mümkün məsələdir. Hər halda mən dil bilmədən xaricə yollanan ilk futbolçu deyiləm.

- Transfer pəncərəsinin bağlandığını nəzərə alsaq, bu kluba keçəcəyiniz halda bu mövsüm oynamağınız mümkün olmayacaq...
- Hazırda bu, mənim üçün vacib deyil. İndi mən yalnız özümü yaxşı tərəfdən göstərmək barədə düşünürəm.