Vadim Ağarəhimov: İnter və Neftçi mənimlə maraqlansa da, rəsmi dəvət olmadı
Azərbaycanın gənclərdən ibarət yığma komandasının sabiq hücumçusu Vadim Ağarəhimov U-21-ə dəvət almamasından danışıb. Azerisport.az saytına açıqlamasında o, bunları söyləyib:
"Milliyə dəvət almamağımın səbəbini özüm də bilmirəm. Dəvət aldığım dövrdə özümü yaxşı tərəfdən göstərmək üçün meydanda əlimdən gələni edirdim. Amma hazırda çağırmırlar və bunun səbəbi özüm üçün də sirr olaraq qalır. Bəlkə də bilirsiniz.
Yeri gəlmişkən, mən Azərbaycan çempionatında oynaya bilərdim. "İnter"lə "Neftçi" mənimlə maraqlanırdı. Amma rəsmi təklif olmadı. Daha sonra məni Latviyaya dəvət etdilər. Amma ailə vəziyyətimə görə oraya gedə bilmədim. Hazırda "Zenit"in futbol məktəbində çıxış edirəm və ümid edirəm ki, Piter klubunun əsas heyətinə düşə biləcəyəm".
Ağarəhimov Rusiya yığmasının seçən Ramil Şeydayevlə AÇ-2017-nin seçmə mərhələsi çərçivəsində baş tutacaq Rusiya - Azərbaycan oyunundan da söz açıb: "Ramillə "Zenit"də çıxış etdiyi dövrdən tanışam. Hərdən zəngləşirik. Amma onunla heç vaxt Azərbaycan yığması barədə danışmamışam. Rusiya - Azərbaycan oyununa gəlincə, fikrimcə, qonaqların yenə qələbə qazanmaq şansı var".
