Pərdis Fərcad-Azad: Bizə bircə qələbə lazımdır ki...
"Sumqayıt"ın hücumçusu Pərdis Fərcad-Azad komandasının Topaz Premyer Liqasının qış fasiləsindən sonrakı uğursuz çıxışından danışıb. Azerisport.az saytına açıqlamasında o, bunları söyləyib:
"Qəbələ" ilə oyunun ilk hissəsində oyunumuz alınmadı. Çox pis oynadıq. İkinci hissədə toparlandıq, amma rəqibdən xal ala bilmədik. "Qəbələ"nin qolu təsadüfi alındı. Top bizim futbolçunun ayağını tapdı və qapıya daxil oldu. Sadəcə, onu etiraf etmək lazımdır ki, rəqibin daha çox qol vəziyyəti oldu. Ardıcıl üç məğlubiyyətə gəlincə, komandaya nə olduğunu bilmirik. Toplanış yaxşı keçmişdi. Amma komandanın qarşısında indi sanki hansısa bir sədd var. Bircə qələbə lazımdır ki, hər şey qaydasına düşsün. Ümid edirəm ki, AZAL-la oyunda buna nail olacağıq. Baş məşqçi məni əsas heyətdə oynatmır. Amma mən inamımı itirmirəm və daha çox çalışıram".
