Xavyer Junior: Məşqlərdə və oyunlarda Samir Məsimovun pis futbolçu olmadığını gördüm
Sloveniyanın "Domjale" klubunun yarımmüdafiəçisi Xavyer Junior Samir Məsimovun bu kluba transferindən, eləcə də "Bakı"da keçirdiyi günlərdən danışıb. Azerisport.az saytına açıqlamasında o, bunları söyləyib:
"Düzünü deyim ki, Məsimovu "Domjale"yə gələnə qədər tanımırdım. Onun oyununu da görməmişdim. Amma məşqlərdə və matçlarda gördüm ki, pis oyunçu deyil. Öz üzərində çalışmağa davam etsə, yaxşı futbolçu olacaq. Klubumuza kömək etməyə gəlib. Amma komandamızda 11 yox, 20 futbolçu var. Onların hamısı ələ düşən şansdan yararlanmağa çalışır. Bu üzdən də Məsimovun əsas heyətə düşüb-düşməyəcəyini bilmirəm".
Məsimov qaldığımız otelə gələndə ona kömək etməyə çalışdım. Bir qədər rus dilini bilirəm. Onunla keçmiş klubum "Bakı"dan, eləcə də "Neftçi" barədə söhbət etdim. Bəzi futbolçularla bağlı suallar verdim. Azərbaycanı, "Bakı"nı tez-tez yada salıram. Keçmiş komandamın nəticələri ilə maraqlanıram. Azərbaycanda yaxşı günlərim olub. Onu unuda bilmərəm".
