AFFA: Pul tələb olunarsa, assosiasiyaya məlumat verin!
AFFA ölkəmizdə futbolun kütləviliyinin təmin olunması və sağlam həyat tərzinin təbliği məqsədilə respublikamızın müxtəlif bölgələrində quraşdırdığı süni ötüklü meydançalarla bağlı müəyyən məqamlara aydınlıq gətirib. Azerisport.az xəbər verir ki, AFFA facebook sosial şəbəkəsindəki səhifəsinə edilən müraciətləri nəzərə alaraq, bunları açıqlayıb:
"Meydançaların quraşdırılmasında məqsəd uşaqlara, yeniyetmələrə, gənclərə bu gözəl idman növü ilə məşğul olmaq, futbol oynamaq üçün şərait yaratmaqdır. Meydançalar əsasən məhəllələrdə, orta, orta ixtisas, ali məktəb və digər ərazilərdə quraşdırılıb. AFFA tərəfindən heç bir süni örtüklü meydança hər hansı şəxsi ərazidə quraşdırılmayıb. AFFA süni ot örtüyünün və onun quraşdırılmasının qarşılığında pul almayıb və bütün bu işlər assosiasiyanın vəsaiti hesabına həyata keçirilib. Meydançaya süni ot örtüyünün quraşdırılması prosesi başa çatdıqdan sonra AFFA həmin meydançanı ərazinin məxsus olduğu və meydançanın salınması barədə müraciət etmiş təşkilatın istifadəsinə verir. Həmin təşkilat da meydançanın istifadəsinə tam məsuliyyət daşıyır. Lakin, meydançanın məhz futbol məqsədilə istifadəsinə daha da əmin olmaq üçün AFFA orada xüsusi lövhələr quraşdıraraq ictimaiyyətə müraciət edir ki, meydançaların istifadəsi üçün pul tələb olunarsa, assosiasiyaya məlumat verilsin. Gələcəkdə, həmin meydança istifadəyə yararsız vəziyyətə düşdükdə və AFFA-ya yenilənmə ilə bağlı müraciət daxil olduqda, müraciət müsbət cavablandırılmayacaq. Çünki həmin meydançadan müvafiq təşkilat və ya ayrı-ayrı şəxslər pul qazanıb, kommersiya məqsədilə istifadə ediblər.
Süni örtüklü meydançalar barədə bütün şikayət və təkliflər AFFA tərəfindən nəzərə alınır və gələcək fəaliyyət üçün qeydiyyatı aparılır. Bizim əsas məqsədimiz uşaqlara, yeniyetmələrə, gənclərə ödənişsiz olaraq futbol oynamaq üçün şərait yaratmaqdır. Əgər bəzi şəxslər bu layihədən şəxsi məqsədləri üçün istifadə edirsə, bu, o adamların vicdanının öhdəsinə düşür.
Fəallığınız üçün sizə təşəkkür edirik! İndi isə sizdən kompüterdən (və ya telefondan) ayrılaraq futbol oynamaq üçün meydançaya getməyinizi xahiş edirik!"
