Tural Cəlilov: XL Avropa Liqasına vəsiqə qazana bilər
"Xəzər Lənkəran"ın kapitanı Tural Cəlilov Topaz Premyer Liqasının 21-ci turu çərçivəsində "Neftçi"yə 0:1 hesabıyla uduzduqları oyundan sonra azerisport.az saytının suallarını cavablandırıb.
- Komandanız pis oynamasa da, son dəqiqələrdə buraxdığı qolla "Neftçi"yə uduzdu. Sonadək dözə bilməməyinizə nə səbəb oldu?
- Oyuna ciddi hazırlaşmışdıq. "Neftçi" ilə oyunların "Xəzər Lənkəran" üçün necə önəmli olduğunu hamı yaxşı bilir. İkinci hissədə daha yaxşı oynadıq. Qol vəziyyətlərimiz də oldu. Amma sonda uduzduq.
- "Neftçi"yə qol vurmağa ən yaxın olan Zaman Mirzəzadə oldu, o da boş qapıya yol tapa bilmədi...
- Həmin epizoda uzaq idim və elə bildim ki, zaman qol vurub. Amma əfsuslar olsun ki, bəxtimiz gətirmədi. Halbuki, həmin epizodda qol vursaydıq, qalib də gələ bilərdik.
- Siz əvvəllər də "Neftçi"yə qarşı oynamışdınız. Bu dəfəki görüşü "Böyük oyun" adlandırmaq olar?
- Olar. Çünki maraqlı və gözəl oyun keçdi. Gərginlik də var idi. Biz bu qarşılaşmada qələbəyə layiq idik. Sadəcə, qol vura bilmədik.
- "Xəzər Lənkəran"ı qarşıda "Neftçi" ilə iki kubok oyunu da gözləyir. Yəqin ki, həmin görüşlərdə qələbə qazanmağa çalışacaqsınız...
- Əlbəttə, bütün diqqətimizi kuboka yönəltmişik. Bizim avrokuboklara çıxmaq şansımız var. "Neftçi" ilə kubok oyunlarına daha böyük istəklə çıxacağıq. Onları keçmək üçün əlimizdən gələni edəcəyik.
- Növbəti turda komandanızı "Zirə" ilə oyun gözləyir. Hansı ki, ilk iki dövrədə debütanta uduzmusunuz...
- Biz hər oyuna böyük motivasiya ilə, xal qazanmaq üçün çıxırıq. "Zirə" ilə oyunda da belə olacaq. Ümid edirəm ki, bu dəfə biz qələbə qazanacağıq.
- "Xəzər Lənkəran"ın iddialı dövründə də bu komandada oynamısınız. İndiki vəziyyətdə bu klubda çıxış etmək sizə pis təsir etmir?
- Təkcə mənə yox, bütövlükdə klubumuzun hər bir azarkeşinə "Xəzər Lənkəran"ı bu vəziyyətdə görmək çox pis təsir edir. Amma biz inanır və ümid edirik ki, komandamız yenə əvvəlki iddiasını geri qaytaracaq və çempionluğa oynayacaq.
