Orxan Sadıqlı: Neftçiyə qalib gəlmək üçün əlimizdən gələni edəcəyik
"Xəzər Lənkəran"ın qapıçısı Orxan Sadıqlı Topaz Premyer Liqasının 21-ci turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb.
- "Neftçi" ilə oyundan nə gözləyirsiniz?
- Məşqçilər şans versələr, mən də meydana çıxacağam. Klubumuzun qələbə qazanması üçün əlimdən gələni edəcəyəm. Bu görüş bizim üçün ən vacib oyunlardan biridir.
- Hər iki komandanın heyəti əvvəlki kimi deyil. Bu üzdən bəzi mütəxəssislər bu komandaların duelini "Böyük oyun" adlandırmaq istəmir...
- Hər iki komandanın elə də ciddi iddiası yoxdur. Amma bu görüşlərin həmişə xüsusi stimulu olub. Biz əzəli rəqibik. Qoy olsun "Böyük oyun"un kiçik oxşarı. İstənilən halda "Neftçi" üzərində qələbə qazanmaq üçün əlimizdən gələni edəcəyik.
- Ötən tur "Qarabağ"a qarşı keçirdiyiniz oyunda heyətdə yer almamışdınız. Niyə siz yox, Tərlan Qasımzadə oynayırdı?
- Bu, baş məşqçinin qərarı idi. Nə vaxt məni meydana buraxsa, onda da oynayacağam.
- Həmin oyunda komandanız 0:3 hesabıyla uduzdu. Komandanız kənardan necə təsir bağışladı?
- Uşaqlar 70 dəqiqə liderə qarşı yaxşı mübarizə apardılar. Standart vəziyyətdən iki qol buraxdıq. Üçüncü qol isə müdafiə xəttimizin səhvi idi. Komandamızın oyununa toplanışa çox gec başlaması təsirini göstərir. Biz üçüncü dövrəyə hazır deyildik.
- "Qarabağ" fanatlarının meydana limon atmasını necə qarşıladınız?
- Nəyisə etməzdən öncə onun nəticəsini düşünmək lazımdır. İnsanlar var ki, limon satmaqla çörək pulu qazanır, ailəsini dolandırır. "Qarabağ" fanatları bunu qəsdən ediblərsə, çox pis haldır.
- Sizcə, Lənkəran klubunun azarkeşləri də buna cavab verməlidirlər?
- Mən artıq söhbətlərin əleyhinəyəm. Bir-birimizi başa düşməliyik. Biri səhv edirsə, digəri həmin səhvdən qaçmalıdır. Nəyisə edəndə diqqətli olmaq lazımdır.
