Vladimir Laziç: Yarımfinalda Azərbaycanla qarşılaşmaq istəyirdik
Futzal üzrə Serbiya yığmasının üzvü Vladimir Laziç bəyan edib ki, Avropa çempionatının yarımfinalında Rusiya ilə yox, Azərbaycanla qarşılaşmağı arzulayırmış. Azerisport.az saytına açıqlamasında o, bunları söyləyib:
"Rusiyanın güclü yığmasının olduğunu bilirəm. Amma Azərbaycan onlara qarşı layiqli mübarizə apardı, xarakter nümayiş etdirdi. Yığmanız çoxlu qol vəziyyəti yaratsa da, yararlana bilmədi. Halbuki, azı 2-3 əlavə qol vura bilərdilər. Belə olan halda Rusiya yığması daha yaxşı oynamağa və qollar vurmağa başladı. Azərbaycan yığması beş meydan oyunçusu ilə çıxış edərkən sürətli oynamadı. Halbuki, məhz həmin vaxt daha sürətli oyun göstərmək lazım idi. Azərbaycan vurmadı, Rusiya isə ələ düşən şanslardan yaxşı yararlanıb, qalib gəldi. Düzünü deyim ki, yarımfinalda Azərbaycana oynamağı çox istərdik. Amma bu, alınmadı. Artıq bizi Rusiya ilə çətin qarşılaşma gözləyir. Biz evdə, doğma azarkeşlərimiz qarşısında oynayırıq. Buna görə mütləq qalib gəlməliyik".
