Zaur Axundov açıqladı: Üç futbolçu bundan sonra millidə olmayacaq

Azərbaycan Futzal Federasiyasının prezidenti Zaur Axundov yığma komandamızın AÇ-2016-nın final mərhələsi çərçivəsindəki çıxışını şərh edib. Azerisport.az saytına açıqlamasında o, öncə bunları söyləyib:

"AÇ-2016 bizim üçün uğursuz alındı. Baxmayaraq ki, sonda ən güclü səkkiz komanda arasında yer aldıq. Komandamızın çıxışını başqa cür adlandırmaq olmaz. Daha çox yerli oyunçuların çıxışından narazı qaldım. Onlardan daha çox şey gözləyirdim".

Federasiya rəhbəri millimizin gənc qapıçısı Rövşən Hüseynlinin çıxışına da toxunub: "İtaliyaya qarşı keçirdiyimiz ilk görüşdəki yaxşı oyundan (0:3) sonra Rövşən ulduz xəstəliyinə tutuldu. Mən komandamızda belə halları qəbul edə bilmirəm. O, Çexiya (6:5) və Rusiya (2:6) ilə oyunlarda çox pis çıxış etdi".

"Təəssüf ki, biz bu turnirə tam hazırlaşa bilməmişdik. Yaxşı sınaqçı rəqib tapa bilmədik. Hətta bunlara rəğmən, Rusiyanı keçə bilərdik. Sadəcə, müdafiə xəttimizdəki zəif çıxışdan sonra qələbə qazanmaq şansımız qalmadı. Hesab 1:1 olarkən fərqlənə bilsəydik, hər şey tam fərqli ola bilərdi".

Axundov dünya çempionatının pley-off mərhələsinin oyunları barədə də danışıb: "Qarşıda dünya çempionatının pley-off matçları var. Azərbaycan futzalı tarixində ilk dəfə dünya çempionatının final mərhələsinə qatılmaq istəyirik. İndiki heyətdən üçü həmin heyətdə yer almayacaq. Amma onların adını sonra açıqlayacağam. Dünya çempionatına vəsiqə qazanmayacağımız halda isə, indiki heyətin 90 faizi komandadan uzaqlaşdırılacaq".