Ağasəlim Mircavadov: Məşqçilər Komitəsi passiv deyil, sadəcə...
AFFA Məşqçilər Komitəsinin üzvü Ağasəlim Mircavadov son dövrlərdə gördükləri işlərdən danışıb. Azerisport.az saytına açıqlamasında o, bunları söyləyib:
"Komitəmizin passiv olması fikri ilə razı deyiləm. Sadəcə, biz öz işimizi afişa etmirik. Lakin bir halda ki, siz soruşursunuz, deyim ki, bir müddət öncə "Neftçi"nin məşqini izləməyə getmişdik, klub rəhbərliyi və məşqçilər korpusu ilə görüşdük, söhbət etdik. AZAL, "Zirə" və digər klublarımızın da düşərgəsinə baş çəkməyi planlaşdırırıq. Ümumiyyətlə, Premyer Liqa klublarının hamısının məşqlərini izləmək planlarımızda var. Milli üzvlərini, gənc futbolçuları izləyirik. Onların hər biri yığma komandalarımızın potensial üzvləridir. Bu iş milli komandamızın mart toplanışı öncəsi çox vacibdir. Əsas yığmamızın baş məşqçisi Robert Prosineçki ilə də əlaqə saxlayırıq. Mart ayına qədər görüləcək işimiz çoxdur".
