Elhad Nəziri: Petrolulu tərk edib Azərbaycana gəlməklə böyük səhv etdim

Azərbaycan yığmasının sabiq müdafiəçisi Elhad Nəziri Rumıniyanın "Metalul Reşiti" klubuna keçidindən danışıb. Azerisport.az saytına açıqlamasında o, bunları söyləyib:

"Mən bu kluba tanış menecerin sayəsində keçdim. O, təklif etdi, mən də baxdım və razılaşdım. Artıq komandaya uyğunlaşmışam. Uşaqların bəzisi məni "Petrolul"da çıxış etdiyim dövrdən tanıyır. İnanıram ki, bu klubda əvvəlki formamı bərpa edə biləcəyəm".

"Mənim üçün bütün oyunlarda sabit çıxış etmək vacibdir. Bu üzdən də klubun neçənci yerdə getməsi barədə düşünmürəm. Düzdür, komanda sonuncu yerdə gedir. Amma üst pillələrə qalxmağımız üçün əlimdən gələni edəcəyəm".

Nəziri Azərbaycan karyerasının uğurlu alınmamasına görə özünü günahkar hesab edir: "Etiraf edim ki, Rumıniyanın əsas liqasında klub tapa bilmədim. Daha doğrusu, təkliflər olsa da, onlara müsbət cavab vermədim. Bunun səbəblərini demək istəmirəm. Azərbaycanda klub tapa bilməməyimin də günahı özümdədir. Buna görə heç kimi günahlandıra bilmərəm. "Petrolul"da hər şey yaxşı idi. Amma Azərbaycana qayıtmaqla böyük səhvə yol verdim. Bu, mənə böyük dərs oldu".

Nəziri həmçinin yığmaya qayıtmaq şansı barədə də danışıb: "Avropada oynamağımın yığmaya qayıtmağıma nə dərəcədə kömək edəcəyini bilmirəm. Bunu zaman göstərəcək. Yığmada oynamağı hər kəs istəyir. Mən də yenidən oraya qayıtmaq istəyərdim. Futbol oynamaq üçün darıxmışam".