Vitali Borisov: Qələbəyə çox inansaq da, gücümüz çatmadı
Futzal üzrə Azərbaycan yığmasının üzvü Vitali Borisov AÇ-2016-nın 1/4 final mərhələsi çərçivəsində Rusiyaya 2:6 hesablı məğlubiyyətdən sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Görüşə pis başlamadıq. Birinci hissəni bütövlükdə, yaxşı keçirdik. Fasiləyə 1:2 hesablı məğlubiyytlə yollandıq. Halbuki, nəticə oyuna görə deyildi. Bizim hələ fasiləyə qədər qol vurmaq üçün nə qədər şansımız oldu. Lakin bir topdan artığını vurmaq mümkün olmadı.
- Bəs ikinci hissədə nə baş verdi?
- İkinci hissədə isə bizdə çox şey alınmadı. Yenə də standart vəziyyətdən qol buraxdıq. Beşinci meydan oyunçusu ilə oynamağımız isə heç bir fayda gətirmədi.
- Standart vəziyyətlərdən çox qol buraxmağımız sizin məşqlərdə bunun üzərində çalışmamağınızdan xəbər verir?
- Bütün standart vəziyyətləri nəzarət altında saxlamaq çox çətindir. Rəqiblərimiz də həmin məqamlar üzərində çox çalışırlar. Qapı qarşısında yarana biləcək bütün təhlükələrin qarşısını almaq asan deyil.
- Rəqib demək olar ki, asanlıqla yarımfinala adladı. Sizin yarımfinala çıxacağınıza inamınız var idi?
- Əlbəttə, var idi. Oyuna da pis başlamamışdıq. Qələbə qazanacağımıza inanırdıq. Amma gördüyünüz kimi, gücümüz çatmadı. Rəqib səviyyəli komandadır. Bu da nəticəyə təsirsiz ötüşmədi.
- AÇ-ni hansı hisslərlə tərk edirsiniz?
- Qrupdan çıxmaqla əsas vəzifənin öhdəsindən gəldik. Bu, bizim minimum hədəfimiz idi. Amma 1/4 finalda Rusiya ilə düşməklə bəxtimiz gətirmədi. Çünki bu komanda ilə əvvəlki oyunlarımızda cəmi bir heç-heçəmiz var.
- Amma bu çempionat göstərdi ki, sürpriz etmək də çətin deyil. Məsələn, Serbiya Portuqaliyanı mübarizədən kənarlaşdırdı, Qazaxıstan son çempion İtaliyanı...
- Biz də sürprizə imza ata bilərdik. Deməli, nəyisə haradasa düz etmədik. Futzal oynamağı hər kəs bacarır.
- Sizə elə gəlmir ki, Azərbaycan yığmasında nələrisə dəyişməyin zamanıdır?
- Bu suala mən cavab verə bilmərm. Belə məsələləri baş məşqçi, rəhbərlik edir. Bizi dəvət ediblər, gəlmişik. Sabah dəyişiklik edəcəklərsə, bununla da barışacağıq.
