AZAL Gəncədə dayandı

AZAL klubunun Topaz Premyer Liqasındakı üç uğurlu seriyası qırılıb. Azerisport.az xəbər verir ki, 20-ci turun Gəncədə “Kəpəz”lə qarşılaşmasında 0:2 hesabı ilə uduzan paytaxt təmsilçisinin qələbə, məğlubiyyətsiz və quru oyunlar seriyaları başa çatıb.

Son 4 turda ardıcıl 4 qələbə qazanan Tərlan Əhmədovun yetirmələri “Xəzər Lənkəran”, “Neftçi”, “Zirə” və “Qarabağ”ı eyni - 1:0 hesabı ilə məğlub etmişdi. Sonuncu dəfə 25-ci turun 2015-ci il dekabrın 7-də “Rəvan”la səfər matçında (0:0) xal itirən AZAL 62 gündən sonra qələbəsiz qalıb. 13-cü turun noyabrın 23-də “İnter”lə səfər matçında 2 cavabsız qol buraxan Tərlan Əhmədovun yetirmələrinin məğlubiyyətsiz oyunlar seriyası isə 76 gün davam edib. Bu müddətdə bakılılar 6 oyunda uduzmayıb. 1:0 hesablı qələbə və “Rəvan”la matçdan başqa, “Sumqayıt” da AZAL-ı yenə bilməyib. Həmin görüşdə paytaxt klubu 2:0 hesabı ilə qalib gəlib.

“İnter”lə oyundan sonra 6 matçda qol buraxmayan “təyyarəçilər”in quru seriyası da Gəncədə qırılıb. Sonuncu dəfə “İnter”lə qarşılaşmanın 85-ci dəqiqəsində Abbas Hüseynovun qoluna üzülən AZAL-ın qapıçısı Stanislav Namaşkonun seriyası 573-cü dəqiqədə dayanıb. Onun qoruduğu qapının toxunulmazlığını “Kəpəz”lə matçın 28-ci dəqiqəsində Budaq Nəsirov qırıb. (PFL)