Qurban Qurbanov: İndi hər bir komanda yaxşı müdafiə oluna bilir

"Qarabağ"ın baş məşqçisi Qurban Qurbanov Topaz Premyer Liqasının 20-ci turu çərçivəsində "Xəzər Lənkəran"a qarşı keçirdikləri oyunu şərh edib. Azerisport.az xəbər verir ki, Ağdam klubunun çalışdırıcısı 3:0 hesabıyla bitən qarşılaşmadan sonra bunları söyləyib:

"Vacib üç xal qazandıq. Oyuna gəldikdə, indi hər bir komanda istənilən rəqibə qarşı yaxşı müdafiə oluna, hətta qalib gələ bilir. Düzdür, "Xəzər Lənkəran" hazırda heç də ən yaxşı günlərini yaşamır. Amma bu gün bizə onlarla mübarizə aparmaq çətin oldu. Biz çoxlu qol epizodunu boşa verdik, xüsusilə də birinci hissədə. Öz futbolçularımızı da təbrik edirəm. Onlar da səbrlə sonadək mübarizə apardılar, qələbə qazanmağı bacardılar.

Qara Qarayevin start heyətdə yer almamasının hansısa səbəbi yoxdur. Biz hər bir futbolçuya oyun təcrübəsi qazanması üçün şərait yaratmağa çalışırıq. Meydana hansı futbolçuların çıxması rəqibdən də asılıdır.

Qarşıda bizi çətin Gəncə səfəri gözləyir. "Kəpəz" ötən ilki oyunlarında yaxşı futbol sərgiləyirdi. "Qəbələ" üzərində qazandıqları qələbə də bu komandanın yaxşı formada olmasından xəbər verir. Amma biz öz futbolumuzu oynmalıyıq. Ola bilsin ki, həmin oyunda heyətdə hansısa dəyişikliklər olsun". (CBC)