Samir Abasov: Qırmızı vərəqə və beş futbolçumuzun olmaması sözünü dedi

"Sumqayıt"ın baş məşqçisi Samir Abasov Topaz Premyer Liqasının 20-ci turu çərçivəsində "Zirə"yə qarşı keçirdikləri oyunu şərh edib. Azerisport.az xəbər verir ki, sumqayıtlıların çalışdırıcısı 0:2 hesabıyla bitən qarşılaşmadan sonra bunları söyləyib:

"İsti başla məğlubiyyətə nələrin səbəb olduğunu deyə bilmərəm. Amma uşaqlar canlarını qoydular. Bəlkə də uşaqlar oyunun əvvəlində konsentrasiyanı itirdilər. Baxmayaraq ki, uşaqlara "Zirə"nin hücum xəttinin sürətindən yararlanmağa çalışacağını bildirmişdim. Təəssüf ki, konsentrasiyanı itirdik. Bizim qol vurmaq üçün şanslarımız oldu. Amma top demək olar ki, oyun təcrübəsi olmayan Ayaz Mehdiyevə dəydi. Bunun da təsiri oldu. On nəfərlə qalandan sonra oynamaq daha da çətinləşdi. Emin Mehdiyevə ikinci sarı vərəqəni göstərməyin nə dərəcədə lazım olub-olmadığını bilmirəm. İstənilən halda uşaqlar sonadək vuruşdular. Fikrimcə, azarkeşlər hakimin bu qərarına məndən gözəl cavab verdilər. Əsas heyətin beş üzvünün bu gün olmaması da sözünü dedi. Amma bir daha deyirəm ki, onları əvəz edən futbolçular da sonadək mübarizə apardılar". (CBC)