Topaz Premyer Liqasında 20-ci tur həyəcanı

Bu gün Topaz Premyer Liqasında 20-ci tura start verilir. Azerisport.az xəbər verir ki, 2016-cı ilin ikinci turunun 5 oyunu 3 gün ərzində baş tutacaq.

İlk oyun günündə bir görüş keçiriləcək. Paytaxt derbisi çərçivəsində "Neftçi” “Rəvan”la üz-üzə gələcək. Paytaxt klubları indiyədək heç-heçə etməyib. Son iki oyunda qonaq komanda 3 qol vuraraq, qalib gəlir. “Neftçi” 7 matçdır meydanı qolsuz tərk etmir. İndiyə qədər baş tutan 10 oyunda daha çox "ağ-qaralar" qalib gəliblər - 8 dəfə. Heç-heçə etməyən tərəflərin duelində "Rəvan" yalnız iki dəfə 3 xala sevinib. Top fərqi də "Neftçi"nin xeyrinə bitib - 16:8. İlk iki dövrədə baş tutan oyunlarda tərəflərin hərəsi bir qələbə qazanıb. "Neftçi" səfərdə 3:1 hesabıyla məğlub etdiyi bu rəqibinə evdə 2:3 hesabıyla uduzub. Bu dəfə isə "aslanlar"ın iddialı rəqibinə ciddi müqavimət göstərməsi inandırıcı görünmür.

İkinci oyun günündə iki görüş baş tutacaq. Öncə "Sumqayıt" "Zirə" ilə qarşılaşacaq. Cari mövsümədək qarşılaşmayan komandaların ilk iki oyununda “Zirə” məğlub olmayıb.  Sumqayıtlıların yeganə ev oyununda qol qeydə aınmayıb. "Zirə"nin meydanında baş tutan görüşdə isə 3:2 hesablı qələbə qeydə alınıb. Zirəlilər bu oyunda da favorit sayıla bilər. Baxmayaraq ki, Samir Abasovun çalışdırdığı Sumqayıt təmsilçisi də iddialı rəqiblərini büdrətməyi bacarır.

Daha sonra çempionatın lideri "Qarabağ" "Xəzər Lənkəran"la münasibətlərinə aydınlıq gətirəcək. Bu komandalar indiyə qədər 34 dəfə üz-üzə gəliblər. Ağdam klubu 17, cənub təmsilçisi isə 12 dəfə qələbəyə sevinib. Beş oyunda isə tərəflər heç-heçəyə razılaşıblar. Top fərqində isə elə də ciddi fərq yoxdur. Ağdamlılar 38:37 hesabıyla öndədirlər. “Qarabağ” son 7 oyunda meydanı qolsuz tərk etməyib. 4 matdır rəqiblərdən heç biri 2 və ya daha çox qol vura bilmir. “Xəzər Lənkəran” 6 görüşdür qalib gəlmir. Ağdam klubu bu oyunun da favoritidir. Fasilədən sonrakı ilk oyununda AZAL-a məğlub olması da Qurban Qurbanovun komandasını qələbə qazanmağa sövq edir. Heyət və maliyyə baxımından ciddi problemlərdən əziyyət çəkən "ağ-yaşıllar"ın bu oyunda nəyəsə nail olması inandırıcı görünmür. Elə ilk iki dövrədəki oyunlarda da ağdamlılar 1:0 hesabıyla üstün olublar.

Son oyun günündə də iki qarşılaşma keçiriləcək. AZAL "Kəpəz"lə üz-üzə gələcək. Tərəflərin əvvəlki 14 oyununda paytaxt təmsilçisi daha çox - 9 dəfə qələbə qazanıb. 3 dəfə heç-heçə qeydə alındığı halda, 2 dəfə də gəncəlilər qalib gəliblər. Top fərqi də bakılıların xeyrinədir - 23:7. AZAL son 10 oyundan yalnız birində qol vurmayıb. Gəncədəki son 5 oyunda heç-heçə qeydə alınmayıb. Son 3 qarşılaşmada qonaq komanda qalib gəlməyib. Cari mövsümdə baş tutan oyunlara gəlincə, Gəncə təmsilçisi 1:0 hesabıyla qələbə qazanmışdısa, Bakıdakı görüşdə 1:1 hesabı qeydə alınmışdı. Qış fasiləsindən sonrakı ilk oyunlarından qalib ayrılan bu kollektivlərin dueli böyük maraqla gözlənilir.

Nəhayət, turun qapanış və mərkəzi matçında "İnter" "Qəbələ"ni qəbul edəcək. Fasilə zamanı Türkiyədə hazırlıq keçən və iddialı olan bu klublar 2016-cı ilə məğlubiyyətlə başlayıb. Bu üzdən də öz aralarındakı oyunun gərgin keçəcəyi dəqiqdir. "Qəbələ" cari mövsümdə bakılılara qalib gələ bilməyib. "İnter" ilk dövrədə 2:1 hesabıyla qalib gəldiyi rəqibi ilə səfərdə də 1:1 hesablı heç-heçəyə nail olub. Bütövlükdə, bu klublar 30 oyunda üz-üzə gəliblər. 14 dəfə paytaxt klubu qalib gəlibsə, qəbələlilər cəmi 6 oyunda 3 xala seviniblər. 10 qarşılaşmada isə heç-heçə qeydə alınıb. Top fərqi də "İnter"in xeyrinədir - 44:25. Son 5 oyunda hər iki komanda qol vurub. Qəbələdə keçirilən son 3 qarşılaşmada eyni hesab – 1:1 hesabı qeydə alınıb.

Topaz Premyer Liqası
20-ci tur
5 fevral (cümə)

16:30. “Neftçi” – “Rəvan”
Hakimlər: Elvin Əsgərov, Rahil Ramazanov, Vüsal Qənbərov, Ziya Nəsirov.
AFFA nümayəndəsi: Rauf Hüseynli.
Hakim-inspektor: Xaqani Məmmədov.
Bakı. “Bakcell Arena”.

6 fevral (şənbə)

15:00. “Sumqayıt” – “Zirə”
Hakimlər: Ömər Paşayev, Elman Musayev, Vüqar Bayramov, Ramil Əhmədov
AFFA nümayəndəsi: Şaiq Həmidov
Hakim-inspektor: Vüsal Əliyev
Sumqayıt. “Kapital Bank Arena”.

17:30. “Qarabağ” – “Xəzər Lənkəran”
Hakimlər: İnqilab Məmmədov, Azər Əsgərov, Coşqun Həsənov, Mahir Məmmədov.
AFFA nümayəndəsi: Vaqif Davudov.
Hakim-inspektor: Kərim Ağayev.
Bakı. Tofiq İsmayılov adına Suraxanı qəsəbə stadionu.

7 fevral (bazar)

13:30. “Kəpəz” – AZAL
Hakimlər: Rəvan Həmzəzadə, Rza Məmmədov, Knyaz Əmiraslanov, Ramil Diniyev.
AFFA nümayəndəsi: Abbas Hüseynov.
Hakim-inspektor: Füzuli Nəcəfov.
Gəncə şəhər stadionu.

17:30. “İnter” – “Qəbələ”
Hakimlər: Rəhim Həsənov, Akif Əmirəli, Cavanşir Yusifov, Nail Nağıyev.
AFFA nümayəndəsi: Mübariz Hüseynov.
Hakim-inspektor: Məlik Həsənov.
Bakı. “İnter Arena”.

Bombardirlər:
7 - Ruslan Qurbanov ("Neftçi"), Riçard Almeyda ("Qarabağ").
6 - Amil Yunanov ("Sumqayıt"), Aleksey Antonov ("Qəbələ").