Rövşən Hüseynli: Çexiyanı özümüz məğlub etməliyik, italyanların köməyini gözləməməliyik

Futzal üzrə Azərbaycan yığmasının qapıçısı Rövşən Hüseynli AÇ-2016-nın final mərhələsi çərçivəsində İtaliyaya qarşı keçirdikləri oyunu şərh edib. Azerisport.az saytına açıqlamasında o, 0:3 hesablı məğlubiyyətlə bağlı bunları söyləyib:

"İtaliyaya qarşı oyunun çətin olacağını bilirdik. Bu, gözlənilən idi. Amadeu qırmızı vərəqə alana qədər hər şey yaxşı idi. Həmin epizod oyunda dönüş nöqtəsi oldu. Sonra ikinci yarı başlayan kimi kobud səhvə yol verdik və bu, işimizi daha da çətinləşdirdi. Bir xal qazanmaq istəyirdik. Buna görə ikinci hissədə beş meydan oyunçusu ilə çıxış etdik. Amma son Avropa çempionu çox yaxşı müdafiə olundu. Rəqib bizi yaxşı analiz etmişdi".

Rövşən qarşıdakı Çexiya ilə oyundan da söz açıb: "Biz çexlərə qalib gələcək gücdəyik. Amadeunu əvəzləyəcək futbolçumuz da var. Məsələn, Ramiz Çovdarovun zərbələri Amadeunun zərbələrindən geri qalmır. Biz italyanların köməyini gözləməyəcəyik ki, onlar çexlərə 3:0 və ya 4:0 hesabıyla qalib gəlsin. Çexiyanı özümüz 4-5 qolla məğlub etməliyik. Hər şeyi özümüz həll etməliyik".