Qurban Qurbanov: Reynaldo bir aya qayıdacaq

"Qarabağ"ın baş məşqçisi Qurban Qurbanovun azerisport.az saytına müsahibəsi

- AZAL-la oyundan sonra komandanın hazır olmadığını demişdiniz. Hələ Antalyada olarkən komandanızın tam olaraq özünə gəlməsi üçün 4-5 tur gözləmək lazım olduğunu söyləmişdiniz. Yenə də bu fikrinizdə qalırsınız?
- Bu, bizdən asılı deyil. Hazırlıq prosesi elədir ki, futbolçunun tam formaya düşməsi üçün müəyyən vaxt tələb olunur. Oyundan oyuna artıracağımızı düşünürəm.

- Yəni futbolçularınız indiki forması ilə də AZAL-a qalib gələcək gücdə deyil?
- Şübhəsiz ki, AZAL-a qalib gəlməyə yetərli gücümüz vardı. Oyundan sonra da dedim ki, sərgilədiyimiz futboldan razı qaldım. Rəqibi bütün komponentlərdə üstələmişdik. Qol vurub, qələbə qazanmaq üçün yetərincə şansımız da oldu. Amma qələbə qazana bilmədiksə, bu, bizim buna yetəcək gücümüzün olmamasından xəbər vermir. Sadəcə, həmin oyun rəqibimiz üçün daha uğurlu alındı.

- Bu məğlubiyyət komandanın daha tez özünə gəlməsinə kömək edəcək?
- Hər məğlubiyyət komandanın xeyrinə olur. Çünki futbolçular özlərini toparlamağa, daha diqqətli olmağa çalışırlar. Fikrimcə, biz də qarşıdakı oyunlarda daha yaxşı çıxış edəcəyik.

- "Xəzər Lənkəran" AZAL-dan da ağır vəziyyətdədir. Düşünmürsünüz ki, futbolçular bu dəfə də rəqibi ciddiyə almaya bilər?
- Ola bilər ki, kimsə "Xəzər Lənkəran"a yuxarıdan aşağı baxsın. Amma məndə və mənim yetirmələrimdə belə şey ola bilməz. Hələ ötən il demişdim ki, 3-4-cü dövrələr çox çətin keçəcək. Biz heç bir rəqibimizi zəif hesab etmirik. Bizim üçün asan oyun da yoxdur.

- Qış fasiləsi zamanı hər kəs çempionatda intriqanın öldüyünü və "Qarabağ"ın asanlıqla çempion olacağını deyirdi. Bəs indi intriqanın bərpa olduğunu demək olar? Çünki "Zirə" sizinlə xal fərqini altıya endirib...
- Ola bilər ki, kimin üçünsə çempionluq intriqası ölüb, amma bizim üçün yox. Əvvəllər də belə idi. Mövsümün sonuna qədər də belə olacaq. Hər bir xal itkisi bizim üstünlüyümüzü azaldır. Ona görə də mövsümün sonuna qədər maksimum diqqətli olmalıyıq. Əks halda bizim üçün yaxşı olmayacaq.

- Reynaldo nə vaxt yaşıl meydanlara qayıdacaq?
- Ona daha bir ay vaxt lazımdır. Hələ ki, fərdi qaydada məşq edir. Amma daha tez sıraya dönməsi də mümkündür. Sadəcə, biz zədəli futbolçularla bağlı heç vaxt tələsmirik.

- Rahid Əmirquliyev nə vəziyyətdədir?
- O da komandadan ayrı çalışır. Bir neçə tur buraxacaq.