Fineo de Araujo: İtaliya yığmasına baş ağrısı yaradacaq gücdəyik

Futzal üzrə Azərbaycan yığmasının hücumçusu Fineo de Araujo AÇ-2016-nın final mərhələsi çərçivəsində İtaliyaya qarşı keçiriləcək oyun öncəsi azerisport.az saytının suallarına cavablandırıb.

- İtaliya ilə oyundan nə gözləyirsiniz?
- Biz bu görüşə tam hazırıq. İtaliya ilə görüş bizim üçün çox vacibdir. AÇ-yə uğurlu start vermək istəyirik. Ümid edirəm ki, bu istəyimizə nail olacağıq.

- Rəqiblə bağlı nə öyrənə bilmisiniz?
- Aydın məsələdir ki, İtaliya güclü komandadır. Dünya səviyyəli oyunçulardan təşkil olunub. Son illərdə dünyanın ən güclü komandalarından biri olduğunu öz nəticələri ilə isbatlayıb.

- AÇ-nin start matçında qitə birinciliyinin son qalibi ilə qarşılaşmaq sizi narahat etmir ki?
- Elə də yox. Əlbəttə, italyanlar güclüdürlər. Amma bizim də güclü komandamız var. İnanın ki, biz onlara baş ağrısı yarada biləcək gücdəyik.

- Qrupun favoriti kimi görürsünüz?
- İlk baxışdan təbii ki, İtaliya favoritdir. Amma qrupumuzda Çexiya da var. Ona görə də kimin necə çıxış edəcəyini indidən demək çətindir. Biz özümüz də bu qrupda rəqabət yarada bilərik.

- Qrupdan çıxa bilməmək fiasko olmayacaq ki?
- Biz bu barədə heç düşünmürük də. Qarşımızda bircə hədəf var - oynamaq və uğur qazanmaq. Öncəliklə qrupdan çıxmaq istəyirik. Sonrasına isə baxacağıq. Hər şey mümkündür. Diqqətli oynamalı və maksimum qələbəyə köklənməliyik.