Kamran Quliyev: Radniçki Amil Yunanova görə rəsmi təklif göndərməyib
"Sumqayıt"ın prezidenti Kamran Quliyev Serbiyanın "Radniçki" klubunun Amil Yunanovla maraqlanmasına münasibət bildirib. Azerisport.az saytına açıqlamasında o, bunları söyləyib:
"Klubdan rəsmi məktub almamışıq. "Radniçki" tərəfindən ciddi maraq olduğunu düşünmürük. Çünki hansısa menecerin sözünə güvənmək olmaz. Bu futbolçu ilə 2,5 illik müqaviləm var. Kluba müraciət etməyin də etik qaydaları var. Onlar FİFA-nın qaydalarını kobud surətdə pozurlar. Məsələ burasındadır ki, hansısa oyunçunun klubu ilə yarım ildən çox müqaviləsi varsa, başqa klubun həmin futbolçu ilə danışıq aparmağa haqqı yoxdur. Biz özümüz də futbolçumuzun perspektivli karyerasının olmasında maraqlıyıq. Yunanovun ötən ilin sonlarında sərgilədiyi parlaq oyun bizi sevindirir. Amma bu, daimi olmalıdır. Futbolçumuz orta səviyyəli Avropa ölkəsindən dəvət alırsa, həmin ölkənin çempionatı bizimkindən güclüdürsə, getdiyi klubda əsas heyətə düşmək uğrunda rəqabət apara biləcəksə, biz buna ancaq sevinə bilərik. Biz də onun artırmasında maraqlıyıq. Onun inkişaf edəcəyinə əmin olduğumuz komandaya getməsinə şərait yaradacağıq".
