Muarem Muarem: AZAL-a uduzacağımızı gözləmirdim
"Qarabağ"ın yarımmüdafiəçisi Muarem Muaremin azerisport.az saytına müsahibəsi
- Qış fasiləsindən sonra AZAL-a qarşı keçirdiyiniz ilk oyunda məğlub oldunuz...
- Çətin oyun olacağını bilirdik. Süni örtüklü meydançada oynamaq ağır olur. Amma biz buna da hazır idik. Hesab edirəm ki, yaxşı oynadıq, qol vəziyyətlərimiz də oldu. Sadəcə, real qol şanslarından yararlanmağı bacarmadıq. AZAL isə ələ düşən yeganə şansdan maksimum yararlanıb, qələbə qazandı. Rəqibi təbrik edirəm. Biz də qarşıdakı oyunlarda daha yaxşı oynayıb, qələbə qazanmağa çalışacağıq.
- "Qarabağ"ın bu məğlubiyyətini gözlənilməz adlandırmaq olar?
- Düzünü deyim ki, uduzacağımızı gözləmirdim. Amma meydanda nəyin baş verəcəyini öncədən heç kim bilmir.
- "Qarabağ" rəqibindən nədə zəif idi ki, belə məğlubiyyətlə üzləşdi?
- Ələ düşən qol vəziyyətlərindən yararlansaydıq, tam fərqli matç olacaqdı. O zaman qələbə də bizim olardı.
- Bu, komandaya qayıdışınızdan sonrakı ilk rəsmi oyun idi. Yəqin ki, belə bir görüşdə uduzmaq sizin üçün ikiqat üzücü oldu?
- Əlbəttə. Məğlubiyyət həmişə üzücü olur. Mən qələbə arzulayırdım.
- Sizin də qol vurmaq şansınız oldu...
- Qol vurmaq üçün çox çalışırdım. Amma əfsuslar olsun ki, alınmadı.
- Premyer Liqanın fasilədən sonrakı ilk turu maraqlı tendensiyanı üzə çıxardı. Ölkə ərazisində hazırlıq keçən üç klub Türkiyədə toplanışda olmuş iddialı rəqiblərinə qalib gəldilər...
- Bu barədə heç nə deyə bilmərəm.
- AZAL-a məğlubiyyət növbəti turlardakı çıxışınıza nə dərəcədə təsir göstərə bilər?
- Bu məğlubiyyət nə şokdur, nə də həyatın sonu. Premyer Liqa uzun yarışdır. Belə məğlubiyyətlər ola bilər. Biz peşəkar futbolçularıq və önümüzdəki oyunlara baxacağıq.
- Çempionatımız sizin olmadığınız dövrdə nə dərəcədə dəyişib?
- Onu deyə bilərəm ki, Premyer Liqa hər il daha da maraqlı keçir. Hər bir oyunda istənilən komandadan qələbə gözləmək mümkündür. Bu, Azərbaycan futbolunun inkişafı baxımından çox önəmlidir.
