Vaqif Cavadov: Neftçi ilə oyundakı səhvləri növbəti görüşlərdə təkrarlamamalıyam
"Sumqayıt"ın hücumçusu Vaqif Cavadov Topaz Premyer Liqasının 19-cu turu çərçivəsində "Neftçi"yə qarşı keçirdikləri oyundan (0:1) sonra azerisport.az saytının suallarını cavablandırıb.
- Oyunla bağlı nə deyərdiniz?
- Pis oynamadıq. Özümüzü yaxşı tərəfdən göstərməyə, nəticə qazanmağa çalışdıq. Amma alınmadı.
- Məğlubiyyətinizə nə səbəb oldu?
- Bircə səhvə yol verdik, "Neftçi" də ondan yararlanıb, qol vurdu. Bu oyundan sonra daha da güclənəcəyik. Yaxşı qol vəziyyətlərimiz oldu. Amma onlardan yararlana bilmədik.
- "Sumqayıt"dakı ilk rəsmi oyundakı çıxışınızı necə qiymətləndirərdiniz?
- Məni çoxdan tanıyırsınız. Öz oyunum haqda heç vaxt danışmıram. Bu gün də danışmayacağam. Sadəcə, öz üzərimdə daha çox işləmək lazım olduğunu düşünürəm. Növbəti oyunlarda bu gün buraxdığım səhvləri təkrarlamağa çalışmalıyam.
- "Sumqayıt" ilk hissə ilə müqayisədə fasilədən sonra fərqli oynamağa başladı. Nə baş verdi ki?
- Xüsusi heç nə. Görüşün ilk on dəqiqəsində yaxşı oynamadıq. İkinci hissədə də elə oldu. İlk dəqiqələrdən səhvə yol verdik və qol buraxdıq. Rəqibdən qorxmurduq. Sadəcə, bir səhv bizə mane oldu. Bütövlükdə, pis oynamadıq.
- Siz özünüz də bir neçə epizodda qol vurmağa yaxın oldunuz...
- Elədir, şansım ldu. Bir epizodda hətta top qapı dirəyinə tuş gəldi. Uşaqların hər biri ürəkdən oynadı. Sadəcə, bu gün bizim günümüz deyildi. Buna görə də qol vura, qələbə qazana bilmədik.
- Meydanda aqressiv görünürdünüz...
- Uduzmağımızı istəmirdim. Aqressivlik də ona görə idi.
- Son dövrlər əvvəlki oyununuzu sərgiləyə bilmirsiniz. Bunu tez-tez komanda dəyişməyinizlə əlaqələndirmək olar?
- Ola bilər. Amma bunun "Neftçi"yə qarşı sərgilədiyimiz bu oyunla heç bir əlaqəsi yox idi.
