Anyete: Neftçinin öz hədəfi var
"Neftçi"nin hücumçusu Anyete Topaz Premyer Liqasının 19-cu turu çərçivəsində "Sumqayıt"a qarşı keçirdikləri oyundan (1:0) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Çox çətin oyun alındı. Amma biz bunu gözləyirdik. Yaxşı ki, hər şeyə rəğmən, sonda qalib gələ bildik.
- Bu mövsüm "Neftçi"də ən yaxşı "Sumqayıt"la oyunlar alınır. Bu komanda ilə oyunlarda cari mövsüm ardıcıl üçüncü qələbə nə ilə bağlıdır?
- Xüsusi bir səbəbi yoxdur. Hərdən elə olur ki, hansısa komandaya qarşı ardıcıl yaxşı oyunlar sərgiləyə bilirsən.
- "Neftçi" hətta parlaq oyun göstərmədiyi halda da, sumqayıtlılara qalib gəlir...
- Bu, futboldur. Hətta oyun getməyəndə də elə bir taktika seçirsən ki, rəqibinə qalib gələ bilirsən.
- İkinci hissədə əvəzlənərkən çox narazı görünürdünüz...
- Sadəcə, həmişə qol vurmaq istəyirəm. Amma buna nail ola bilməyəndə narazı qalıram.
- Qol vurmağınıza nə mane olur ki?
- Qol vurmağı çox istəsəm də, futbol kollektiv oyunudur. Bu görüşdə də komandam qalib gəldi. Əsas da budur. Mövsümün birinci yarısında məhsuldar çıxış edə bilməməyimin səbəbi var idi. Çünki çox vaxt zədəli oldum.
- Epizodların birində penalti tələb etdiyiniz halda simulyasiyaya görə sarı vərəqə aldınız...
- Bu, hakim tərəfindən verilən inanılmaz bir qərar idi. Şokdaydım. Orada qayda pozuntusu var idi.
- Komandanız avrozonadan uzaqda qalsa da, bəzi klublar hətta avrokuboklara vəsiqə qazansalar da belə, çıxış etməkdən məhrum edilmək təhlükəsi ilə üz-üzədirlər. Bu, sizə stimul verir?
- Bu və ya digər komandanın hansı mövqedə olmasının bizə aidiyyatı yoxdur. Onların hansının avrokuboklarda oynayıb-oynamayacağının da həmçinin. Bizim öz hədəfimiz var. Mövsümün sonunda avrokuboklara vəsiqə verən yerlərdən birində olmaq istəyirik.
