AZAL-ın futbolçusunda xərçəng xəstəliyi aşkarlandı

AZAL-ın müdafiəçisi Rüfət Musayevdə xərçəng xəstəliyi aşkarlanıb. Azerisport.az xəbər verir ki, 28 yaşlı futbolçu buna görə bir aydır komandanın məşqlərindən kənarda qalıb.

Yaxın günlərdə Musayevin əməliyyat olunması planlaşdırılır. Onu həmçinin kimyəvi üsullarla müalicə də gözləyir.

AZAL-ın kapitanı Rail Məlikov saytımıza açıqlamasında ölkə futbol ictimaiyyətini Rüfətə dəstək olmağa çağırıb: "Komanda ona yardım etməyə çalışır. "Qarabağ", "Qəbələ", "İnter"də çıxış edən futbolçular da ona kömək etməyə söz veriblər. Fikrimcə, bu, bizim borcumuzdur. Arzulayan hər bir kəs ona köməyini göstərə bilər".

Qeyd edək ki, "Qarabağ"ın fiziki hazırlıq üzrə məşqçisi Çudomir Çakarov da çoxdan idi xərçəng xəstəliyindən əziyyət çəkirdi. Amma o, bu yaxınlarda ağır xəstəliyə qalib gələrək komandanın düşərgəsinə qayıtmağa nail oldu.