Robert Prosineçki: AFFA mənimlə müqavilənin müddətini artırmaq istəyir
Azərbaycan yığmasının baş məşqçisi Robert Prosineçki millimizdəki işindən, komandada yer alan futbolçuların potensialından, öz gələcəyindən danışıb. Azerisport.az sizi xorvatiyalı mütəxəssisin diqqət çəkən açıqlamaları ilə tanış edir.
"Bir il əvvəl Azərbaycan yığmasına baş məşqçi təyin olundum. Həmin vaxt komanda seçmə mərhələdə bir xal da qazana bilməmişdi. Amma geridə qalan bir il ərzində biz Malta üzərində qələbə ilə irəliyə doğru addımlar atmağa başladıq. Məşqçilər korpusu olaraq, hesab edirik ki, artıq futbolçular əvvəlkindən fərqli indi necə futbol göstərmək lazım olduğunu daha yaxşı başa düşürlər. Halbuki, ondan öncə komanda hər oyunda uduzurdu, bir neçə qol buraxırdı. Bunun da nəticəsi kimi, komandada özünə inam yox idi. Futbolçular öz güclərinə əmin deyildilər. Mənim ilk hədəfim də onları məhz daha artığını edə biləcək gücdə olduqlarına inandırmaq idi".
Prosineçkinin sözlərinə görə, azərbaycanlı futbolçularda potensial var: "Çünki bu ölkənin döyüş idman növləri üzrə yaxşı ənənələri var. Aqressivdirlər, döyüşməyə, mübarizə aparmağa hazırdırlar. Deməli, futbolçularda da bu keyfiyyətlərdən yararlanmaq olar. Meydanda bu və digər keyfiyyətlərdən faydalanmaq lazımdır. Çünki bu, bir üstünlükdür. İstedadlı gənclər var. Onlar əsas yığmada çıxış etməyə can atırlar. Azərbaycanın gənclərdən ibarət yığmasının Antalya Kubokundakı qələbəsidə mənim bu sözlərimi təsdiq edir. Bu ölkənin futbolunun gələcəyi var".
Millimizin çalışdırıcısı onu da bəyan edib ki, AFFA ilə yeni müqavilə imzalamağa hazırlaşır: "Azərbaycan yığmasında çalışmaqla bağlı müqaviləmin müddəti 2017-ci ildə başa çatacaq. Amma AFFA-nın bu müqavilənin müddətini AÇ-2020-nin seçmə mərhələsinin sonunadək artırmaq istəməsinə dair etirafı var. İşimdən razıyam. Həqiqətən də əla şəraitimiz, yaxşı infrastrukturumuz, sabit maliyyəmiz var".
Prosineçki AFFA ilə işbirliyinə başladığı günləri də yada salıb: "Mənimlə əlaqə saxladılar. öz istəklərini bildirdilər, təklifi nəzərdən keçirdim və qəbul etdim. Hesab edirəm ki, düzgün addım atmışam". (Dnevnik)
