Prosineçki: Ümid edirəm ki, U-21-in üzvləri yaxın gələcəkdə əsas milliyə yüksələcəklər

Azərbaycan yığmasının baş məşqçisi Robert Prosineçkinin azerisport.az saytına müsahibəsi

- Azərbaycanın U-21 yığmasının Antalya Kubokundakı çıxışı barədə nə deyə bilərsiniz?
- Rəqibini 4:0 hesabıyla məğlub edirsənsə, ardıcıl dörd oyunda qələbə qazanırsansa, bu, şübhəsiz ki, uğurdur. Turnir komandamızın özünü yaxşı tərəfdən göstərməsinə şərait yaratdı. Bu turnirdəki uğur gənc futbolçularda əlavə inam yaradacaq. Ümid edirəm ki, bu futbolçular yaxın gələcəkdə əsas milliyə yüksələ biləcəklər. Belə turnirlər futbolçularımıza lazımdır.

- Hansı oyunu xüsusi qeyd edərdiniz?
- Dörd oyunun hər biri yığmamız üçün uğurlu alındı. Ama Ukraynaya qarşı oyun ən çətini idi. Çünki rəqib çox güclü idi. Bütövlükdə, komandamız bu turnirdə yaxşı futbol sərgilədi, gözəl qollar vurdu, topa və oyuna yaxşı nəzarət etdi. Turnirin gedişində çoxlu müsbət məqamlar gördük.

- Bu turnirin qalibi olması yığmamız üçün nə dərəcədə faydalı olacaq?
- Bu, gənc futbolçular üçün vacibdir. Komanda kuboka sahib çıxdı. Oyunçular üçün nəyəsə nail olduqlarını hiss etmək çox vacibdir. Bu, əlavə bir stimuldur. Biz məşqçilər üçün də futbolçuları iş başında görmək önəmli idi. Bu komandada potensial var.

- Əsas millinin mart toplanışında U-21-dən neçə futbolçu dəvət etməyi planlaşdırırsınız?
- Namiq Ələsgərovla Elnur Cəfərovu tanıyıram. Onlar yığma komandanın oyunçularıdır. Mart toplanışı zamanı əsas milliyə gənclərdən daha bir futbolçu dəvət edəcəyəm. Amma onun adını sonra açıqlayacağam.