Məqsəd İsayev: Ruslar çox istəkli ola bilər, amma biz də qələbəyə acıq

Azərbaycanın 21 yaşadək futbolçulardan ibarət yığma komandasının və "Neftçi"nin müdafiəçisi Məqsəd İsayevin azerisport.az saytına müsahibəsi

- U-21 millimizin Antalya Kubokundakı 100 faizlik nəticəsi barədə nə deyərdiniz?
- Qısa desəm, hər şey yaxşıdır (gülür). Bu, komandamızın gücündən xəbər verir. Kifayət qədər keyfiyyətli turnirdir. Sabit çıxış edirik. Bütün bunların mart ayında baş tutacaq Rusiya ilə seçmə mərhələ oyunu öncəsi baş verməsi də çox yaxşıdır.

- Bakıdakı 0:3 hesablı məğlubiyyətdən sonra ruslar çox hirslidirlər və revanş hissi ilə alışıb-yanırlar. Millimiz bu rəqibin qabağında duruş gətirə biləcək?
- Bilirik ki, onlarda arzu, istək ən üst səviyyədə olacaq. Amma bu, o demək deyil ki, biz meydana istəksiz çıxacağıq. Biz də qələbəyə acıq. Hər bir oyunda qələbə qazanmaq istəyirik. Hər şeyə rəğmən, Rusiyaya qələbə üçün gedəcəyik. Bir dəfə qələbə qazandıq, bunu yenidən təkrarlamağa çalışacağıq.

- Bəhreynə də qalib gəlsəniz, Antalya Kubokunun qalibi olacaqsınız. Amma öncədən millimizin Kosovoya qarşı oynamayacağı və turnirin qalibi olmaq şansının olmadığı bildirilirdi. Bu qələbə sizə nə dərəcədə vacibdir?
- Bizim nə qədər kubokumuz var ki, belə bir mükafatdan da imtina edək? Şübhəsiz ki, bu turnirin qalibi olmaq istəyirik. Xüsusilə də bunun bir addımlığında olduğumuz kuboku. Özü də Bəhreynə qalib gəlsək, turnirin vaxtından öncə qalibi adını qazanacağıq. Bu, yaxşı nəticə sayıla bilər. Ümid edirəm ki, kuboku Bakıya gətirə biləcəyik.

- U-21-in toplanışı və oyunları səbəbindən "Neftçi"nin hazırlığından kənar qaldınız. Bu, sizə problem yaratmayacaq?
- "Neftçi"nin də təlim-məşq toplanışına qatılmışdım. Daha sonra isə yığmanın düşərgəsinə gəldim. Zədədən sonra bu turnir mənim üçün göydəndüşmə oldu. Nə qədər çox oynasam, bir o qədər yaxşıdır. Çempionatın startına qədər hazır olacağam.

- "Neftçi" Bakıda mini-turnirin qalibi oldu. Antalya Kubokunu qazanmaqla həm də komanda yoldaşlarınızdan geri qalmamağı hədəfləyirsiniz?
- (gülür) Elədir. Mənə də bir kubok qazanmaq vacib lazımdır (gülür). "Neftçi"dəki komanda yoldaşlarımı da qalib olmaları münasibətilə təbrik edirəm.

- U-21-in oyunlarını əsas millimizin baş məşqçisi Robert Prosineçki də izləyir. Necə düşünürsünüz, o, sizə də göz qoyur?
- Yaxşı oynasam, əsas milliyə çağırılacağım an da çox uzaqda deyil.

- İndi sizin mövqeyinizdə Maksim Medvedev oynayır...
- Bu, o demək deyil ki, Medvedev karyerasını başa vurmayana qədər milliyə dəvət ala bilmərəm. Ümid edirəm ki, mənim də vaxtım gələcək və millidə oynayacağam.