İnterin prezidenti: UEFA bizi avrokuboklardan kənarlaşdırsa, bunu sakit qəbul edəcəyik
"İnter"in prezidenti Rəşad Qasımov bəyan edib ki, komandası növbəti avrokubok mövsümünü buraxa bilər. Azerisport.az saytına açıqlamasında o, bunları söyləyib:
"Futbolçulara olan borcların qaytarılması yönündə işlərimiz davam edir. Bir futbolçuya olan borcu bağlamışıq. Üç futbolçu ilə razılığa gəlmişik, daha ikisi ilə də danışıqlar gedir. Borcun bir hissəsini ödəməklə onlardan 15-16 aylıq vaxt istəmişik ki, qalan məbləği də ödəyək. Artıq bu barədə sənədləri AFFA-ya və UEFA-ya göndərmişik. Ümid edirəm ki, UEFA-nın Klublara Maliyyə Nəzarəti Orqanı bu məsələyə baxacaq və bizi başa düşəcəklər".
Qeyd edək ki, UEFA dekabr ayında "İnter"lə bağlı ciddi sanksiyalar tətbiq edib. UEFA-nın Klublara Maliyyə Nəzarəti Orqanı (Club Financial Control Body) tərəfindən aparılmış monitorinq zamanı məlum olub ki, “İnter” qaydaların 66 və 66bis saylı maddələrinin tələblərini yerinə yetirməyib və klubun əməkdaşlara vaxtı ötmüş borcları mövcuddur.
Bunu nəzərə alaraq, UEFA-nın Klublara Maliyyə Nəzarəti Orqanı dekabrın 10-da keçirilmiş iclasında aşağıdakı qərarları qəbul edib:
“İnter” növbəti 3 mövsüm ərzində (2016/17, 2017/18 və 2018/19) əldə etmiş idman nəticələrinə görə UEFA-nın klub yarışlarında iştirak etmək hüququ qazanarsa, 1 mövsüm ərzində bü hüquqdan məhrum olunur. Əgər klub 31 yanvar 2016-cı il tarixinədək yaranmış borcların ödənilməsini təsdiq edən sənədləri UEFA-ya təqdim edərsə, bu cəza qüvvədən düşür.
Amma Qasımovun sözlərinə görə, onlar bu vaxt ərzində bütün problemləri yoluna qoya bilməyəcəklər: "Bu müddət ərzində bütün borcları ödəyə bilməyəcəyik. Ümid edirəm ki, UEFA-ya göndərəcəyimiz sənədlər bu problemin həllinə kömək edəcək. UEFA-ya onu da bildirmişik ki, kluba yeni rəhbərlik təyin olunub və bizə vaxt lazımdır. UEFA bizi avrokuboklardan uzaqlaşdırsa da, bunu sakit qəbul edəcəyik. Hədəfimiz klubu xilas etməkdir. Üstəlik, hələ avrokubokların yeni mövsümünə vəsiqə qazanmaq lazımdır. Yayda Azərbaycan futbolunda maliyyə durumunun necə olacağı da məlum deyil. Hansı klub qalacaq, hansı yox, bilinmir. Ola bilər ki, UEFA özü "İnter"in avrokuboklarda oynamasına razı olsun".
