Qəbələ Pavel Paşayevlə niyə müqavilə bağlamağa tələsmir?
"Qəbələ"nin Azərbaycan yığmasının və Ukraynanın "Metallurq" (Zaporojye) klubunun müdafiəçisi Pavel Paşayevlə müqavilə bağlamaq istəməməsinin səbəbi müəyyənləşib. Azerisport.az saytına açıqlama verən klubun meneceri Zaur Əzizov deyib ki, əslində, Paşayev "Qəbələ" üçün sərfəli oyunçudur.
Çünki o, Azərbaycan pasportuna malikdir və yığmamızda çıxış edir. Komandada yerli futbolçuların sayının az olduğunu nəzərə alsaq, onun heyətə düşməsində ciddi problem olmamalıdır.
Lakin Əzizovun sözlərinə görə, Paşayevlə müqavilə imzalansa belə, onun əsas heyətdə oynayıb-oynamayacağı bəlli deyil. Bu üzdən də məşqçilər korpusu və klub rəhbərliyi bu barədə qərar verməyə tələsmir. Baxmayaraq ki, Paşayev iki həftəyə yaxındır "Qəbələ"də baxışdadır və baş məşqçi Roman Qriqorçuk da onu bəyəndiyini etiraf edib.
