Yaşar Vahabzadə: Millinin daha yaxşı futbol oynamasını istəyirəm

Azərbaycanın U-21 yığmasının baş məşqçisi Yaşar Vahabzadənin azerisport.az saytına müsahibəsi

- Antalya Kubokundakı ikinci oyunda Səudiyyə Ərəbistanı üzərində darmadağına (3:0) sevindiniz. Oyun barədə nə deyə bilərsiniz?
- Nəticədən razı qaldım. Amma sərgilədiyimiz oyun tam xoşuma gəlmədi. Uşaqlardan daha artığını gözləyirdim.

- Bəs belə oyun sərgiləməyinizin səbəbi nədir?
- Əsas səbəblərdən biri güclü külək idi. Bununla yanaşı, ötürmələrdə çoxlu səhvlərə yol verirdik.

- Bəlkə rəqibin ilk dəqiqələrdən azlıqda qalması və erkən qol vurmağımız komandamızı arxayınlaşdırdı?
- Buna inanmıram. Amma böyük ehtimalla bunun da təsiri oldu. Baxmayaraq ki, uşaqlara arxayınlaşmamağı tapşırmışdım. Sadəcə, gənc futbolçulara bunu izah etmək o qədər də asan deyil. Hesabda öndə olan futbolçularımız rəqibin də azlıqda olduğunu görüncə elə bilirlər ki, qələbə təmin olunub.

- İstənilən halda, millimiz iki oyundan maksimum nəticə ilə Antalta Kubokunun lideridir...
- Bu, sevindirməyə bilməz. Amma nəticələrimizdən asılı olmayaraq, daha yaxşı futbol sərgiləməyə çalışmalıyıq. Turnir hədəflərimizə gəlincə, növbəti matçlardan da qalib ayrılmağa çalışacağıq.

- Deməli, kuboku və mükafat fondunu qazanmaq istəyiniz var?
- Bəli, niyə də olmasın? Yaxşı oynayıb, qələbə qazanmağa davam etsək, vətənə kubokla qayıda bilərik.

- Bu toplanışı millimiz üçün necə qiymətləndirərdiniz?
- Görülən işdən razıyam. Uşaqlar məşqlərə və oyunlara ciddi yanaşırlar.

- Azərbaycanın AÇ-2017-nin seçmə mərhələsindəki rəqibi - Rusiya yığması da Birlik Kubokunun qalibi oldu...
- Bilirəm. Məndə olan məlumata görə, Rusiya yığması bu turnirə bir sıra yeni futbolçularla qatılıb. Ramil Şeydayev də komandada olub. Buna baxmayaraq, onlar turnirin qalibi adını qazanıblar. Deməli, Rusiya Azərbaycanla matça ciddi hazırlaşır. Maraqlı faktlardan biri də odur ki, ruslar qrupdakı bütün rəqiblərinə 2:1 hesabıyla qalib gəlib.