Qəbələ Dneprə məğlub oldu
Mövsümün ikinci yarısına Türkiyədə hazırlaşan “Qəbələ” bu gün qardaş ölkədə son yoxlama oyununu keçirib. Azerisport.az xəbər verir ki, yanvarın 10-dan Antalyada təlim-məşq toplanışında olan “qırmızı-qaralar” 3-cü sınağında Ukraynanın “Dnepr” klubu ilə görüşüb.
Qonşu ölkədə Almaniyanın “Osnabryuk” (1:1) və İsveçrənin “Sürix” (4:0) klubları ilə qarşılaşan Roman Qriqorçukun yetirmələri yanvarın bu matç ilə hazırlıqları tamamlayıb. Ayın 25-də vətənə dönəcək komanda “Dnepr”lə qarşılaşmada məğlubiyyətlə üzləşib.
Qeyd edək ki, Ukraynanın 3 ən titullu klubundan biri olan “Dnepr” Miron Markeviçin baş məşqçiliyi altında qış fasiləsinə 4-cü pillədə yollanıb. Ötən mövsüm ölkə çempionatında 3-cü olan Dnepropetrovsk klubu UEFA Avropa Liqasının finalınadək irəliləyib. Əsası 1918-ci ildə qoyulan komanda SSRİ dövründə 2 çempionluq, 1 kubok, 1 Superkubok sevinci yaşayıb. Bundan başqa, çempionatda 2 gümüş və 2 bürünc qazanan “Dnepr” 2 dəfə Federasiya kubokuna sahib çıxıb. "Qəbələ"nin rəqibi 1 dəfə bu turnirdə, 1 dəfə isə Superkubokda həlledici oyunda uduzub. Ukrayna çempionatlarında 2 gümüş və 6 bürünc əldə edən Dnepropetrovsk təmsilçisi kubokun finalında 3 dəfə çıxış edib.
Yoxlama oyunu
24 yanvar
“Qəbələ” – “Dnepr” - 0:1 (0:1)
Antalya. “Gloria Sport Arena”.
"Qəbələ"nin start heyəti: Dmitri Bezotosnı, Arif Daşdəmirov, Rafael Santos, Voyislav Stankoviç, Məhəmməd Mirzəbəyov, Vadim Abdullayev, Aleksey Qay, Rəşad Eyyubov, Aleksey Antonov, Ermin Zets, Dodo.
