Zaur Svanadze: İnterin 2-ci pillədəki yerini qoruması çətin olacaq

"İnter"in baş məşqçisi Zaur Svanadzenin azerisport.az saytına müsahibəsi

- Qazaxıstan "Atırau"suna qarşı keçirdiyiniz son yoxlama oyununuzla (0:0) bağlı nə deyə bilərsiniz?
- Əfsuslar olsun ki, yenə bir futbolçumuz bu oyunda zədə aldı. Bütövlükdə, toplanış dövründə bir neçə oyunçumuzu itirdik. Mirhüseyn Seyidov zədəli idi. İndi də İlkin Qırtımov sıradan çıxdı. Matça gəlincə, pis oynamadığımızı düşünürəm.

- Bəs bütövlükdə, toplanışı necə qiymətləndirərdiniz?
- Bütövlükdə, normal toplanış keçdik. Baxmayaraq ki, yoxlama oyunlarında rəqib qapılarına bir dənə də qol vura bilmədik.

- Belə görünür ki, Rauf Əliyevin sıraya dönməsini gözləmək lazım gələcək?
- Raufun sıraya dönməsinə hələ çox vaxt qalır. Təxminən, iki ay gözləməliyik.

- Deməli, müdafiə və yarımmüdafiə xətti normaldır, hücumda isə problemlər var?
- Problem sadəcə, qol vura bilməməyimizdir. Hücumlarımızı qolla tamamlaya bilməməyimiz bizi narahat edir. Buna baxmayaraq, demək olar ki, mövsümün qalan hissəsinə hazırıq. Qol vurmağa da başlayandan sonra hər şey daha yaxşı olacaq.

- Yeni futbolçular - Kamran Ağayev, Vüqar Nadirov və Qara Qarayevin durumu necədir?
- Onlar tədricən bizim oyun üslubumuza alışırlar. Amma hər birinə müəyyən vaxt lazımdr. Kamranda problem yoxdur. Amma Vüqar bizim oyun stilimizə uyğunlaşmalıdır. Zamanla hər şeyin qaydasına düşəcəyinə inanıram.

- Yəqin ki, fasilə müddətində mövsümün qalan hissəsi üçün hədəflərinizi də müəyyənləşdirməyə vaxtınız oldu...
- İkinci pillədə qalmağımız çox çətin olacaq. Rəqiblərimiz az deyil. Amma biz layiqli çıxış etməyə çalışacağıq.