Tərlan Əhmədov: Turnirin yaşamasını çox istərdik

AZAL-ın baş məşqçisi Tərlan Əhmədov AFFA və PFL tərəfindən təşkil olunan mini turnir çərçivəsində "Neftçala" üzərində qazandıqları 3:1 hesablı qələbədən sonra fikirlərini bölüşüb. Azerisport.az xəbər verir ki, o, bunları söyləyib:

"Maraqlı oyun alındı. Bu, həm qış fasiləsində, həm də turnirdəki son oyunumuz idi. Artıq "Qarabağ"la 19-cu turun çempionat oyununa hazırlaşacağıq. Qələbə qazansaq da, "Neftçala"nın da qol vəziyətləri oldu, hətta onların birindən yararlana da bildi. Turnirə gəlincə, maraqlı alındı. Rəqabət yaxşı idi. "Neftçi"ni də turnirin qalibi olması münasibəti ilə təbrik edirəm. Keçirdiyimiz dörd oyunun hər biri maraqlı oldu. Çox istəyərdik ki, bu turnir yaşasın və gələcəkdə daha çox iştirakçısı olsun". (CBC)